काठमाडौँ— नेकपा (एमाले) का स्थायी समिति सदस्य कर्ण थापा पार्टी मुख्यालय च्यासलमै आफ्नै पार्टीका युवाबाट दुव्र्यवहारमा परेका छन्। ११औँ राष्ट्रिय महाधिवेशनको लोगो सार्वजनिक गर्ने कार्यक्रममा सहभागि हुन पुगेका थापालाई अध्यक्ष केपी शर्मा ओलीको कार्यालय प्रवेशका क्रममा धकेलिएको भिडियो सार्वजनिक भएपछि एमालेभित्रको आन्तरिक तनाव सतहमा आएको छ।

मध्यान्हतिर अध्यक्ष ओली गाडीबाट ओर्लिएर कार्यालय भवनतर्फ लागिरहेका बेला थापा पहिल्यै त्यहाँ उपस्थित थिए। ओलीलाई ‘रास्ता खाली गर्नु’ भन्दै केही युवाहरूले थापालाई एक्कासी समातेर धकेलेको भिडियोमा देखिन्छ। गुण्डागर्दी शैलीमा हातपात गर्न खोजेपछि थापाले तत्काल प्रतिकार गर्दै सोधेका थिए— ‘यो के गर्न खोज्नु भएको ? किन धकेलिरहनुभएको ?’

ओली अगाडि सरेपछि मात्र ती युवाहरूले थापालाई छोडेको देखिन्छ। दुव्र्यवहार गर्नेहरू पार्टीभित्र ‘ओली समूहका आक्रमक समर्थक’ भएको दाबी थापाको नजिकका नेताहरूले गर्दै आएका छन्। थापा पछिल्लो समय पूर्व राष्ट्रपति विद्यादेवी भण्डारीको सदस्यता नवीकरण प्रकरणमा पार्टी नेतृत्वविरुद्ध खुलेर बोलिरहेका थिए।

सोही कारण उनी ओली पक्षधर केही समूहको निशानामा परेको आँकलन गरिन्छ। अझ, आसन्न महाधिवेशनमा अध्यक्षका प्रत्याशी बन्न लागेका वरिष्ठ उपाध्यक्ष ईश्वर पोखरेललाई खुलेर समर्थन गरिरहेका थापा कार्यक्रमस्थलमै धकेलिनु एमालेभित्र गम्भीर आन्तरिक विभाजनको संकेतका रूपमा हेरिएको छ।

पार्टीभित्र वैचारिक मतभिन्नता र प्रतिस्पर्धा चर्किरहेका बेला स्थायी समिति सदस्यमाथि सार्वजनिक रूपमा गरिएको ‘अपमान’ ले एमाले नेतृत्वको आन्तरिक संयम, शिष्टाचार र संगठनात्मक अनुशासनमाथि गम्भीर प्रश्न उठेको टिप्पणी राजनीतिक विश्लेषकहरूले गरिरहेका छन्।