काठमाडौँ– काठमाडौं महानगरपालिकाका मेयर बालेन साह पितृशोकमा परेका छन्। उनका बुबा तथा अनुभवी आयुर्वेद चिकित्सक रामनारायण शाहको सोमबार नयाँ बानेश्वरस्थित सिभिल अस्पतालमा उपचारक्रममै निधन भएको हो।

आइतबार बिहानै बेहोसी अवस्थामा अस्पताल लगिएका साहको अवस्था लगातार गम्भीर बन्दै गएको थियो। अस्पताल स्रोतका अनुसार रामनारायण साह केही दिनदेखि नै बिरामी थिए। मधुमेहसँगै सुरु भएको पिसाब संक्रमण क्रमशः शरीरभरि फैलिएको र मस्तिष्कमा समेत असर पुगेको चिकित्सकहरूले बताएका छन्

एक चिकित्सक भन्छन्–‘उहाँलाई आइतबार अस्पताल ल्याउँदा नै होस थिएन। संक्रमण गम्भीर थियो। उपचारका क्रममा आज निधन भयो।’ आयुर्वेद चिकित्सकका रूपमा निकै समय नरदेवीस्थित आयुर्वेदिक अस्पतालमा सेवा दिएका रामनारायण पछि सिंहदरबारस्थित वैद्यखानामा सरुवा भएपछि त्यहाँबाट सेवानिवृत्त भएका थिए।

पेशागत रूपमा दक्ष, सरल र अनुशासित चिकित्सकका रूपमा परिचित साहका परिवारमा श्रीमती, दुई छोरा र १ छोरी छन्। घटनापछि प्रधानमन्त्री सुशीला कार्की सोमबार सिभिल अस्पताल पुगेकी थिइन्। उनले मेयर बालेन साहसँग भेटेर संवेदना व्यक्त गरिन।

परिवारले अन्तिम संस्कार तथा अन्य प्रक्रियाबारे अझै जानकारी सार्वजनिक गरेको छैन।