काठमाडौँ— तिब्बती शरणार्थीका नाममा गलत विवरण र फर्जी कागजातका आधारमा यात्रा अनुमति पत्र (ट्राभल डकुमेन्ट) जारी गरेको आरोपमा परराष्ट्र मन्त्रालयका सहसचिव पुष्पराज भट्टराई पक्राउ परेका छन्।

प्रहरीको केन्द्रीय अनुसन्धान ब्यूरो (सीआईबी)ले राहदानीसम्बन्धी कसुरमा काठमाडौँ जिल्ला अदालतमा दर्ता भएको मुद्दाका आधारमा सोमबार उनलाई काठमाडौंको कागेश्वरी मनोहरा नगरपालिकाबाट नियन्त्रणमा लिएको हो।

सीआईबीका प्रवक्ता एसएसपी अनुपम शमशेर जबराका अनुसार भट्टराईविरुद्ध राहदानी ऐनअन्तर्गत अनुसन्धान अघि बढाइएको छ। उनले गलत विवरणका आधारमा ट्राभल डकुमेन्ट जारी गरेको प्रारम्भिक प्रमाण फेला परेपछि पक्राउ गरिएको र थप अनुसन्धान भइरहेको जानकारी दिए।

प्रहरीका अनुसार भट्टराई शाखा अधिकृतका रूपमा कार्यरत रहँदा तिब्बती शरणार्थीहरूलाई गैरकानुनी रूपमा यात्रा अनुमति पत्र उपलब्ध गराएर मानव तस्करीसँग सम्बन्धित सञ्जाललाई सहयोग गरेको आरोप लागेको छ। अनुसन्धानमा भारतीय शरणार्थी शिविरमा रहेका व्यक्तिहरूका लागि समेत फर्जी विवरण र कागजातका आधारमा ट्राभल डकुमेन्ट जारी गरिएको भेटिएको दाबी प्रहरीको छ।

नेपालमा रहेका शरणार्थीलाई विदेश भ्रमणका लागि यात्रा अनुमति पत्र जारी गर्न गृह मन्त्रालयको सिफारिससहित निवेदन आवश्यक पर्ने कानुनी व्यवस्था छ। तर, उक्त प्रक्रिया उल्लंघन गर्दै गलत विवरणका आधारमा अनुमति पत्र जारी गरिएको आशंकामा उनीमाथि अनुसन्धान सुरु गरिएको प्रहरीले जनाएको छ।

सीआईबीका अनुसार भट्टराईसँग सम्बन्धित घटना २०६८ सालतिरको भए पनि विस्तृत अनुसन्धानपछि २०८२ चैतमा काठमाडौं जिल्ला अदालतमा राहदानी ऐनअन्तर्गत मुद्दा दर्ता गरिएको थियो। सोही मुद्दाको सिलसिलामा सोमबार उनलाई पक्राउ गरिएको हो।

पक्राउपछि भट्टराईलाई आवश्यक कानुनी प्रक्रिया पूरा गरी अदालतमा उपस्थित गराउने तयारी भइरहेको सीआईबीले जनाएको छ। प्रहरीले घटनाको अनुसन्धान जारी रहेकाले ट्राभल डकुमेन्ट जारी गर्ने प्रक्रियामा संलग्न अन्य व्यक्ति वा सम्भावित सञ्जालबारे पनि अनुसन्धान भइरहेको जनाएको छ।

हालसम्म आरोपको सम्बन्धमा भट्टराई वा परराष्ट्र मन्त्रालयको औपचारिक प्रतिक्रिया सार्वजनिक भएको छैन। प्रहरीका अनुसार अनुसन्धानको निष्कर्ष र अदालतको अन्तिम फैसला नआएसम्म उनीमाथि लगाइएका आरोप कानुनी परीक्षणको प्रक्रियामै रहनेछन्।