चितवन– भरतपुर महानगरपालिका–२८ गोलाघाट नजिकै एउटा शव भेटिएको छ। नारायणी र राप्ती नदी मिसिने स्थानको टापुमा शव भेटिएको हो।

शव भेटिएको जानकारी पाएपछि सुरक्षाकर्मी त्यसतर्फ लागेको चितवनका सीडीओ इन्द्रदेव यादवले जानकारी दिएका छन्। शुक्रबार विहान नारायणघाट–मुग्लिन सडकको सिमलतालबाट पहिरोसँगै दुइवटा बसहरु त्रिशूली नदीमा खसेका थिए।

त्यसमा रहेका तीन जना यात्रु झ्यालबाट हामफालेर निस्किए। अन्य यात्रु बसमै वगेको आशंका छ। खोजी गर्ने क्रममा एक भारतीय सहित ३ जनाको शव भेटिएर सनाखत भइसकेको जिल्ला प्रहरी कार्यालय चितवनका डिएसपी भेषराज रिजालले बताए।

शनिबार गोलाघाटमै भारतीय नागरिक ऋषि पाल साहको शव भेटिएको थियो। उनी गणपति यातायातको बसमा चढेको खुलेको थियो। यसैगरी, शनिबारनै गैँडाकोटमा माडी–१ का २२ वर्षीय विकास परियार र सर्लाहीको बरहथवा नगरपालिका–३ का १९ वर्षीय रमित कुशर माझीको शव फेला परेको थियो।

प्रहरीका अनुसार विकास एन्जल डिलक्स र रमित गणपति ट्राभल्सको बसमा सवार रहेको खुलेको छ।

नारायणगढ मुग्लिन सडकखण्डका सिमलतालमा २८ असारको विहान साढे ३ बजे पहिरोमा परेर बेपत्ता भएका दुई वटा बसमा चलानीमा उल्लेख गरिएकाभन्दा १५ जना यात्रु बढी रहेको पाइएको छ।

यात्रुका आफन्तले जिल्ला प्रशासन कार्यालयमा बसमा यात्रा गरेका तर चलानीमा उल्लेख नभएकाहरुको विवरण टिपाएका छन्। काठमाडौंबाट गौर जाँदै गरेको बागमती प्रदेश ०३२४९५ ख ००१ नम्बरको गणपति डिलक्समा चलानमा २७ भएपनि त्यस वाहेक ११ जना यात्रु रहेको खुलेको छ। सवै गरी ३८ जना यात्रु रहेको पाइएको सीडीओ कार्यालयले जनाएको छ।

यस्तै, बीरगञ्जबाट काठमाण्डौं जाँदै गरेको बागमती प्रदेश ०३–००६ ख १५१६ नम्बरको एन्जल डिलक्समा चलानीमा २३ यात्रु देखिए पनि बीचबाट थप ४ जना यात्रु चढेको पाइएको छ। सवै गरी २७ जना यात्रु बसमा यात्रारत रहेको देखिएको छ।

घटनामा कुल ६५ यात्रु परेको देखिएको छ। ति मध्ये ३ जना झ्यालबाट हाम फालेर बाँचेका थिए। त्यसैगरी हालसम्म ४ जनाको शव भेटिएको छ। अझै ५८ जना यात्रुको अवस्था अज्ञात छ।