मोरङमा बाल्टीमा भरेको पानीमा मुन्टो डुवेर वृद्धको मृत्यु, निर्वस्त्र भेटियो शव
शीर्ष खबर 
विराटनगर– मोरङमा बाल्टीमा भरेको पानीमा मुन्टो डुवेर एक वृद्धको मृत्यु भएको छ। यसरी मृत्यु हुने सुनवर्षी नगरपालिका–२ का ७५ वर्षीय पुनलाल राजवंशी हुन।
घरको कोठाभित्र पानी भरेको बाल्टीमा टाउको डुबेर मृत्यु भएको अवस्थामा उनलाई फेला पारिएको छ। सोमबार साँझ करिव साढे ७ बजे उनको शव फेला परेको प्रहरीले जनाएको छ।
मोरङ प्रहरीका डीएसपी ज्ञानेन्द्रबहादुर बस्नेतका अनुसार बालटिनमा घोप्टो परेर टाउको डुवेको र निर्वस्त्र अवस्थामा राजवंशीलाई मृत फेला पारिएको हो। घट्नाको बारेमा स्थानीयले प्रहरीलाई जानकारी दिएका थिए।
शवलाई पोस्टमार्टमका लागि रंगेली अस्पतालमा राखिएको छ। राजवंशीको मृत्युलाई प्रहरीले अस्वभाविक भन्दै अनुशन्धान सुरु गरेको छ। यद्यपी उनको शरीरमा कुनै चोटपटक देखिएको छैन।
प्रहरीका अनुसार उनी घरमा एक्लै बस्दै आएका थिए। पत्नीको केही समयअघि मृत्यु भइसकेको र उनका सन्तान नरहेको प्रहरीले जनाएको छ।
