प्रतिघण्टा २० मिलिमिटर वर्षा हुँदा काठमाण्डौं डुब्यो, रुपनीमा प्रतिघण्टा ७० मिलिमिटर वर्षा

काठमाण्डौं– सप्तरीको रुपनी गाउँपालिका स्थित रुपनी बजारमा सन १९९३ मा कुलेखानीमा क्लाउड ब्रष्ट (आरीघोप्टे वर्षा) हुँदाको भन्दा अति धेरै वर्षा भएको छ।
कुलेखानीमा आरिघोप्टे वर्षा हुँदा प्रतिघण्टा ६५ मिलिमिटर मापन गरिएको थियो। यसैगरी, गत असार २३ र २४ गते कन्चनपुरमा आरीघोप्टे वर्षा हुँदा २४ घण्टाको अवधिमा ४४.२ मिलिमिटर वर्षा भएको थियो।
रुपनीमा एक घण्टाकै अवधिमा ७० मिलिमिटर वर्षा मापन भएको छ। सप्तरीमा सोमबार साँझ साढे ६ बजेदेखि मंगलबार बिहान करिब साढे १० बजेसम्म वर्षा भएको थियो। तर वर्षाले कुनै क्षति नभएको सप्तरीका सीडीओ मेखबहादुर मंग्रातीले बताए।
साना खोलानालामा बाढी आएको भए पनि क्षती नभएको तथा कोशी नदीको बहाव सामान्य रहेको उनले बताए। काठमाडौंमा आज बिहान एक घण्टाको अवधिमा २० मिलिमिटर भन्दा पनि कम वर्षामा सडक, बस्ती र सरकारी कार्यालय जलमग्न भएका छन्।