मन्दिर जाँदै गरेका आमाछोरा सवार स्कुटर दुर्घटना हुँदा छोराको मृत्यु, आमा घाईते
शीर्ष खबर 
काठमाण्डौं– रूपन्देहीमा मन्दिर जाँदै गरेका आमाछोरा सवार स्कुटरलाई मोटरसाईकलले ठक्कर दिँदा एक जनाको मृत्यु भएको छ भने एक जना गम्भीर घाइते भएका छन।
दुर्घटनामा बुटवल उपमहानगरपालिका १३ का २३ वर्षीया अंकृत पाठकको मृत्यु भएको हो। बुटवल उपमहानगरपालिका–१३ बेलबासमा लु १९ प ८८७५ नम्बरको मोटरसाइकल र विपरीत दिशाबाट आइरहेको लु ८५ प ३१३३ नम्बरको स्कुटर ठोक्किएका थिए।
दुर्घटनामा गम्भीर घाइते भएका स्कुटर चालक पाठकको उपचारको क्रममा लुम्बिनी प्रादेशिक अस्पताल, बुटवलमा निधन भएको इलाका प्रहरी कार्यालय बुटवलका डीएसपी विजयराज पण्डितले जानकारी दिए।
दुर्घटनामा परी अंकृत पाठककी ४३ वर्षीया आमा गौमुखी गम्भीर घाइते भएकी छन्। साउनको अन्तिम सोमबार उनीहरू परोहा परमेश्वर बोलबाम धाम जाँदै थिए।
मोटरसाइकलका चालक कपिलबस्तुको वाणगंगा घर भएका १८ वर्षीय सागर थारू पनि घाइते भएका छन्। घाइते दुवै जनाको लुम्बिनी प्रादेशिक अस्पताल बुटवलमा उपचार भइरहेको प्रहरीले जनाएको छ।
