घुमाउने वहानामा सुन्दरीजल पुर्‍याएर प्रेमिकाको हत्या, ढुङ्गाको कापमा लुकाएको शव फेला परेपछि पक्राउ परे प्रेमी

काठमाण्डौं– सिरहा घर भई काठमाण्डौंमा ज्याला मजदुरी गर्ने महिलाको हत्या गरेको आरोपमा प्रहरीले सर्लाहीका २ जनालाई पक्राउ गरेको छ।

काठमाण्डौं–३, बसुन्धरा वस्दै आएकी रामदुलारीलाई गोकर्णेश्वर नगरपालिका–१ सुन्दरीजलमा पुर्‍याएर हत्या गरेको आरोपमा प्रहरीले सर्लाहीको चक्रघट्टा गाउँपालिका–३ का ४० वर्षीय रामविनय महरा र बसगरिया गाउँपालिका–५ का २४ वर्षीय सन्तोषराम महरालाई पक्राउ गरेको हो।

मृतक रामदुलारी र पक्राउ परेका रामविनय प्रेमी–प्रेमीका हुन भने रामविनय सन्तोषका फुपाजु हुन। रामदुलारी र रामविनाय करिव २ वर्षदेखि प्रेम सम्वन्धमा रहेको खुलेको छ। रामविनय जुत्ता सिलाउने र रामदुलारी ज्याला मजदुरीको काम गर्थे। उनीहरु प्रेम सम्बन्धमा रहेपछि पछिल्लो समय असमझदारी वढेको र पटक पटक झगडा समेत परेको खुलेको छ।

रामविनयले बताए अनुसार रामदुलारी दिनहुँ मापसे गर्थिन। आफुबाहेक अन्य पुरूषसँग पनि सम्बन्ध राख्ने गरेको आशंका भएपछि सन्तोषसँग मिलेर हत्या गर्ने योजना बनाएको उनले बताएका छन्। जिल्ला प्रहरी परिसर काठमाडौंका एसपी नवराज अधिकारीका अनुसार रामविनयको योजना अनुसार नै रामदुलारीको हत्या भएको हो।

योजनाअनुसार रामविनयले रामदुलारीलाई घुम्न भनेर सुन्दरीजल लगेका थिए। त्यहाँ पुगेपछि रामविनयले रामदुलारीलाई डिलबाट बोक्सेदहमा हुत्याई दिए। घाइते भएकी रामदुलारीलाई दुबै जनाले पालैपालो ढुंगाले टाउकोमा प्रहार गरी हत्या गरेको प्रहरीले जनाएको छ।

हत्यापछि बोक्सेदह आसपासकै ढुंगाको कापमा रामदुलारीको शव लुकाएर उनीहरु त्यहाँबाट फर्किएका थिए। गत बिहीबार सुन्दरीजल घुम्न गएका व्यक्तिले ढुंगाको कापमा मान्छेको खुट्टा देखेपछि प्रहरीलाई खबर गरेका थिए।

प्रहरी वृत्त बौद्ध र जिल्ला प्रहरी परिसर काठमाडौंले घटनास्थल मुचुल्का गरेर शव पोष्टमार्टमका लागि त्रिवि शिक्षण अस्पताल महाराजगञ्जमा पठाएको थियो। मृतकको टाउकामा चोट देखिएपछि हत्या नै हुन सक्ने भन्दै प्रहरीले अनुसन्धानलाई तीव्रता दिएको थियो। सोही क्रममा उनका प्रेमी र सहयोगीलाई पक्राउ गरिएको प्रहरीले जनाएको छ।


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट