काठमाण्डौं– सिन्धुपाल्चोक स्थित बाह्रबिसे–तातोपानी सडकअन्तर्गत छ्याक्सानजिकै भोटेकोशी नदीमा बोलेरो खस्दा वेपत्ता दुई मध्ये महिलाको शव फेला परेको छ।

घटनास्थलबाट करिब १५ किलोमिटर दक्षिण त्रिपुरासुन्दरी गाउँपालिका–६ ड्यामसाईडमा शनिबार महिलाको शव फेला परेको हो। सुनकोशी नदीको किनारमा रहेको ढुंगाको कापमा शव फेला परेको सिन्धुपाल्चोक प्रहरीका डिएसपी निरञ्जन भट्टराईले बताए।

उक्त शव बोलेरोमा सवार बाहृबिसे नगरपालिका–९ की ३५ वर्षीया सुन्तली तामाङको भएको प्रहरीले जनाएको छ। मृतकका ससुरा धनबहादुर तामाङले शवको सनाखत गरेका छन। बोलेरोका चालक भोटेकोशी गाउँपालिका–५ का ३८ वर्षीय सानु शेर्पा भने अझै फेला परेका छैनन्।

बा २० च २१८५ नं. को बोलेरो भने क्षतिग्रस्त अवस्थामा शुक्रबार साँझ नदीबाट निकालिएको थियो। ७ घण्टा लगातारको प्रयासपछि बोलेरो निकालिएपनि त्यसमा सवार दुवै जना वेपत्ता थिए। शुक्रबार बिहान बाह्रबिसे नगरपालिका– ६ बोर्डरल्याण्ड ढुङ्गाखानी छ्याक्साभन्दा करिव १ सय मिटर तल सर्वसाधारणले गाडीको टायर देखिएपछि प्रहरीलाई खबर गरेका थिए।

इलाका प्रहरी कार्यालय बाह्रबिसेको सशस्त्र प्रहरी र स्थानीयबासी उद्धारमा खटिएका थिए। बोलेरो बिहीबार बेलुकानै सडकबाट नदीमा खसेर दुर्घटना भएको हुनसक्ने प्रहरीको अनुमान छ।