रवि लामिछानेविरुद्ध पक्राउ पुर्जी जारी भएकै हो कि जिस्क्याएको मात्रै हो ?

काठमाण्डौं– सहकारी ठगी प्रकरणमा मुछिएका रवि लामिछानेलाई पक्राउ गर्ने कुरा आईतबार साँझ देखि नै चर्चामा छ। तर, अहिलेसम्म उनी पक्राउ परेका छैनन्।
वरु उनले आफ्ना समर्थकलाई आइतबार राति पार्टी कार्यालयमा उतारेर सरकारलाई नै चुनौती दिए। राति अबेरसम्म पार्टी कार्यालयमै बसेका लामिछाने १० बजेतिर कार्यकर्तालाई सम्बोधन गरेर निस्किएका थिए। सम्वोधनका क्रममा उने पक्राउ गर्ने प्रतिवाद गर्ने भन्दै कार्यकर्तालाई एलर्ट रहन आदेश दिए।
यति मात्रै होईन लामिछानेले अमेरिकामा रहेको प्रधानमन्त्री केपी शर्मा ओलीलाई सामाजिक सञ्जालबाटै आँखा नसन्काउन चेतावनी दिए। ‘न्युयोर्क बाट आँखा नसन्काउनुस् प्रधानमन्त्री ज्यु, फर्केर आउनुस्, बसेर कुरा गरौं, सहकारी पीडितलाई न्याय दिने नियत भए म रुम मिलाउछु, बिचौलियाको घर चाहिन्न। बाँकी भोलि…’ भन्दै उनले प्रधानमन्त्रीलाई नै ब्यंग्य गरे।
यता, आज पनि रविलाई पक्राउ गर्ने चर्चा चलिरहेको छ। बिहानैदेखि रास्वपाका नेताहरू पार्टी कार्यालयमा भेला भएका छन्। सभापति लामिछाने पनि वनस्थलीस्थित चःमतीमै छन्। पदाधिकारीसहितका नेताहरू पनि सभापति लामिछानेसँग आन्तरिक छलफलमा छन्। बाहिर समर्थकहरू भेला हुने क्रम बढिरहेको छ।
तर, लामिछानेलाई पक्राउ गर्न पुर्जी जारी भए–नभएकोबारे अन्यौलता छ। तर अदालत र प्रशासन यसबारे तैचुपमैचुप छन्। अदालत स्रोतका अनुसार रविलाई पक्राउ गर्न आइतबारै पक्राउ पुर्जी जारी भइसकेको छ। अदालतले पक्राउ पुर्जी जारी गरेर कास्की प्रहरीलाई दिइसकेको छ। यसको पुष्टि भने भइसकेको छैन।
तर कास्की प्रहरीका एसपी मोहनकुमार थापाले रविविरुद्ध पक्राउ पुर्जी जारी भइनसकेको बताएका छन्। पोखराको सूर्यदर्शन बचत तथा ऋण सहकारीको रकम गोर्खा मिडियामा लगेर अपचलन गरेको आरोप लागेका छविलाल जोशीलाई कास्की प्रहरीले आइतबार साँझ पक्राउ गरेर पोखरा लगेको छ। छवि पक्राउ परेपछि रविलाईपनि पक्राउ गर्ने तयारी रहेको हल्ला चलेको हो।