काठमाडौँ — बारा र मकवानपुरको सिमामा रहेको धार्मिक स्थल चुरियामाई मन्दिर नजिक सोमबार बिहान भएको बस दुर्घटनामा दुई जनाको मृत्यु भएको छ। दुर्घटनामा अन्य केही घाइते भएका छन्।

प्रहरीका अनुसार मन्दिरको उकालोतर्फ गुडिरहेको बस अचानक पछाडि गुड्न थालेपछि दुर्घटना भएको हो। अनियन्त्रित रूपमा पछाडि गुडेको बसले ओरालोमा रोकिएको मोटरसाइकललाई किच्दा दुर्घटना भयो।

प्रहरीले घटनास्थलमै दुई जनाको मृत्यु भएको पुष्टि गरेको छ। मृतकको परिचय अहिलेसम्म खुल्न सकेको छैन। घाइतेहरुलाई स्थानीय तथा नजिकैका विभिन्न अस्पतालमा उपचारका लागि लगिएको छ।

दशैं र नवरात्रका बेला चुरियामाई मन्दिर क्षेत्रमा विशेष मेला लाग्ने भएकाले दर्शनार्थीहरूको ठूलो घुइँचो हुन्छ। त्यसै कारण सडकमा सवारी चाप बढ्ने भएकाले दुर्घटनाको जोखिम पनि उच्च हुने गरेको स्थानीयको भनाइ छ।

दुर्घटनापछि केही समय मन्दिर आसपासको सडक अवरुद्ध बनेको थियो। स्थिति सहज बनाउन इलाका प्रहरी कार्यालय सिमरा र अमलेखगञ्जबाट प्रहरी टोली खटाइएको छ। प्रहरीले बस नियन्त्रणमा लिएर थप अनुसन्धान अघि बढाएको जनाएको छ।

यसअघि पनि चाडपर्वका दिन चुरियामाई मन्दिर जाने बाटोमा ठूला सवारी साधन अनियन्त्रित हुने र दुर्घटनाको जोखिम बढ्ने गरेको स्थानीयले बताएका छन्।