हेटौंडा– नेकपा एमालेको ११औँ महाधिवेशनका लागि मकवानपुरबाट प्रतिनिधि छनोट गर्दा अध्यक्षको उम्मेदवारी घोषणा गरेका इश्वर पोखरेल समर्थक जिल्ला अध्यक्ष नै प्रतिनिधिमा पराजित भएका छन्। जिल्लाभरि चलिरहेको आन्तरिक प्रतिस्पर्धाबीच प्रतिनिधि सभा क्षेत्र नम्बर २ मा सर्वसम्मत चयन भए पनि क्षेत्र नम्बर १ मा भने कडा प्रतिस्पर्धामार्फत प्रतिनिधि तय गरिएको हो।

क्षेत्र नम्बर १ मा उम्मेदवार बनेका जिल्ला अध्यक्ष श्रीधर पोखरेल मतदान प्रक्रियामा पराजित भए। श्रीमतीको उपचारका क्रममा वीर अस्पतालमै रहेका पोखरेलले वारेसमार्फत उम्मेदवारी दिएका थिए। तर, अन्तिम मतपरिणामले उनीसँग ३३४ मत मात्र रहेको देखायो, जुन खुला तर्फका ४ कोटा भित्र पर्न पर्याप्त भएन। कुल १७ उमेदवारमध्ये नवीन सिग्देल, फूर्वा दोर्जे लामा, अणराज जर्गा मगर र सुनिल मोक्तान विजयी बनेका छन्। यससँगै अध्यक्षसहित खुला तर्फ १३ जना पराजित भएका छन्।

पराजयपछि सामाजिक सञ्जालमार्फत प्रतिक्रिया दिँदै पोखरेलले आफूलाई साथ दिने मतदाताप्रति आभार व्यक्त गरे। उनले ‘भ्रामक प्रचार’ को विषय उठाउँदै २० प्रतिशतभन्दा कम मत पर्नुको कारण संगठनभित्र समीक्षा आवश्यक हुने बताए। यद्यपि, उनले एमालेको ११औँ महाधिवेशनमा अध्यक्ष पदका लागि इश्वर पोखरेललाई समर्थन गर्ने आफ्नो अडान पुनः दोहोर्याए।

क्षेत्र नम्बर १ बाट प्रतिनिधिमा अणराज जर्गा मगर, नवीन सिग्देल, फुर्वा दोर्जे लामा, सुनिल मोक्तान, आरती पाठक, विना कुमारी थिङ, सीता विष्ट र बोलबहादुर कार्की निर्वाचित बने। त्यस्तै, क्षेत्र नम्बर २ बाट हिदम लामा, एकालाल श्रेष्ठ, बलराम बल, भगवती पुडासैनी, रोहन लामा, सुमित्रा काफ्ले, विदुर हुमागाईँ, गीता काफ्ले र देवकृष्ण विक निर्विरोध प्रतिनिधि चयन भए।

मकवानपुरबाट चयन भएका प्रतिनिधिहरू सबै एमाले अध्यक्ष केपी शर्मा ओली समूहका मानिएका छन्, जसले आगामी महाधिवेशनमा ओली–समर्थित लाइन मजबुत हुने संकेत दिएको छ।