काठमाडौँ– कोशी प्रदेश सरकारका आन्तरिक मामिला तथा कानुन मन्त्री इन्द्रमणी पराजुलीको सरकारी निवासमा राति प्रहरीले खानतलासी गरेको सार्वजनिक भएको छ। यो विषय संघीय संसद्सम्मै पुगेको छ।

मन्त्री पराजुली सरकारी कामका सिलसिलामा जिल्ला बाहिर रहेका बेला विहिबार राति करिब १० बजे प्रहरी टोलीले सरकारी क्वार्टरमा प्रवेश गरी कोठा तथा घरभित्र खोजतलास गरेको दाबी गरिएको छ। घटनाको वैधानिकता, उद्देश्य र प्रक्रियामाथि प्रश्न उठेको छ। नेकपा एमालेका सांसद राजेन्द्रकुमार राईले प्रतिनिधिसभामै उक्त विषय उठाउँदै ‘नयाँ सरकार आएपछि यस्तो किन भयो?’ भन्दै घटनाको निष्पक्ष छानबिन गर्न सरकारसँग माग गरेका छन्।

शुक्रबार प्रतिनिधिसभाको बैठकमा विशेष समय लिएर बोल्दै सांसद राईले कोशी प्रदेशका आन्तरिक मामिला तथा कानुन मन्त्री पराजुलीको सरकारी निवासमा प्रहरीले रातिको समयमा खानतलासी गरेको जानकारी आफूले पाएको बताए।

उनका अनुसार घटना भएको समयमा मन्त्री पराजुली आफ्नो गृह जिल्ला संखुवासभा गएका थिए। मन्त्री निवासमा मन्त्री स्वयं उपस्थित नरहेको अवस्थामा प्रहरी टोली पुगेको र घर तथा कोठाभित्र खोजतलास गरेको विषय गम्भीर भएको उनको भनाइ थियो।

‘हिजो बेलुका राति १० बजे आन्तरिक कानुन मन्त्रालय सम्हाल्नुभएका इन्द्रमणी पराजुलीको क्वार्टरमा प्रहरीले खानतलासी गरेको छ,’ सांसद राईले संसदमा भने, ‘उहाँ संखुवासभा जानुभएको रहेछ। उहाँ नभएको अवस्थामा राति प्रहरीहरू गएर घर र कोठा खानतलासी गरेका रहेछन्।’

राईले घटनाको कारणबारे सरकार स्पष्ट हुनुपर्ने माग गर्दै यस्तो कदम कानुनी प्रक्रिया अनुसार गरिएको हो वा होइन भन्ने विषयमा समेत प्रश्न उठाए। ‘त्यहाँ किन यस्तो भयो ? नयाँ सरकार आएपछि यो के भएको हो ? यसको छानबिन गरियोस्,’ उनले भने।

संसदमा विषय उठेपछि उक्त घटनाको प्रकृति, खानतलासीको कारण, प्रहरीसँग रहेको कानुनी आधार तथा त्यसका लागि अदालत वा सम्बन्धित निकायबाट अनुमति लिइएको थियो वा थिएन भन्ने विषय चासोको केन्द्र बनेको छ।

यद्यपि, सांसद राईले संसदमा घटना उल्लेख गरे पनि प्रहरीले कुन प्रयोजनका लागि मन्त्रीको सरकारी निवासमा खोजतलास गरेको थियो भन्नेबारे कुनै विवरण सार्वजनिक गरेका छैनन्। कोशी प्रदेश सरकार, गृह प्रशासन तथा नेपाल प्रहरीका तर्फबाट पनि घटनाबारे औपचारिक प्रतिक्रिया आइसकेको छैन।

आन्तरिक मामिला तथा कानुन मन्त्रालय प्रदेश सरकारको सुरक्षा, शान्ति–सुरक्षा र प्रशासनिक संयन्त्रसँग प्रत्यक्ष सरोकार राख्ने मन्त्रालय भएकाले सो मन्त्रालयका मन्त्रीको सरकारी निवासमै रातिको समयमा भएको भनिएको प्रहरी गतिविधिले राजनीतिक र प्रशासनिक वृत्तमा चासो बढाएको छ।

संसदमा उठेको विषयमाथि सरकारले के प्रतिक्रिया दिन्छ र घटनाबारे आधिकारिक विवरण सार्वजनिक हुन्छ वा हुँदैन भन्ने विषयलाई अहिले अर्थपूर्ण रूपमा हेरिएको छ। यस्तो घटनामा कानुनी प्रक्रिया, अधिकार क्षेत्र र राज्यका निकायबीचको समन्वयसम्बन्धी प्रश्नहरू समेत जोडिने भएकाले छानबिनको मागले थप महत्व पाएको छ।