काठमाडौँ– आफूलाई गृह मन्त्रालयसँग सम्बन्धित जिम्मेवार व्यक्ति भनेर चिनाउँदै प्रहरी संगठनभित्र अनधिकृत पहुँच बनाउन खोजेको आरोपमा एक युवक पक्राउ परेका छन्। प्रहरीले काठमाडौँको कोटेश्वरस्थित खरिबोट क्षेत्रबाट ३० वर्षीय आदित्य सिंहलाई नियन्त्रणमा लिएर अनुसन्धान अघि बढाएको छ।

जिल्ला प्रहरी परिसर काठमाडौँका अनुसार सिंहले गृह मन्त्रालयको प्रभावशाली व्यक्तिको परिचय दिँदै प्रहरी कार्यालयहरूसँग सम्पर्क बढाउने, विभिन्न विषयमा चासो राख्ने तथा संगठनभित्र पहुँच स्थापित गर्न खोजेको प्रारम्भिक अनुसन्धानबाट खुलेको छ।

प्रहरी स्रोतका अनुसार उनले आफूलाई गृह मन्त्रालयसँग प्रत्यक्ष सम्बन्ध भएको व्यक्ति भन्दै प्रहरी अधिकृतहरूसँग सम्पर्क गर्ने र प्रहरीसम्बन्धी गतिविधिबारे जानकारी लिन खोज्ने गरेका थिए। त्यसक्रममा उनको गतिविधि शंकास्पद देखिएपछि प्रहरीले खोजबिन सुरु गरेको थियो।

अनुसन्धानका क्रममा सिंहको गृह मन्त्रालयसँग कुनै औपचारिक सम्बन्ध नरहेको प्रारम्भिक रूपमा खुलेपछि उनलाई पक्राउ गरिएको प्रहरीले जनाएको छ। प्रहरीले उनले मन्त्रालयको नाम र हैसियत प्रयोग गरेर कुन उद्देश्यका लागि पहुँच बनाउन खोजेका थिए, कस–कससँग सम्पर्क गरेका थिए र त्यसबाट कुनै अनुचित लाभ लिन खोजिएको थियो वा थिएन भन्ने विषयमा विस्तृत अनुसन्धान गरिरहेको छ।

कोटेश्वरस्थित खरिबोट क्षेत्रबाट पक्राउ परेका सिंहमाथि आवश्यक कानुनी प्रक्रिया अघि बढाइएको जिल्ला प्रहरी परिसर काठमाडौंले जनाएको छ। प्रहरीका अनुसार घटनासम्बन्धी थप विवरण अनुसन्धानको क्रममा संकलन भइरहेकाले अहिले नै अन्य सम्भावित संलग्नता वा गतिविधिबारे निष्कर्षमा पुग्न नसकिने अवस्था छ।

अनुसन्धानबाट प्राप्त प्रमाणका आधारमा थप तथ्य सार्वजनिक गरिने जनाइएको छ।