राजविराज– सप्तकोशी नदीमा पानीको बहाव ५६ वर्षयताकै उच्च मापन गरिएको छ। यसअघि कोशी ब्यारेजमा सन् १९६८ अक्टोबर ५ तारिखका दिन ७ लाख ८८ हजार २ सय क्युसेक वहाव मापन गरिएको थियो।

आज बिहान ७ बजेको मापन अनुसार कोशी ब्यारेजमा वाढीको वहाव ६ लाख ६१ हजार ५ क्युसेक छ। यसअघि ३ बजेको मापनमा पानीको बहाव ६ लाख ४३ हजार ५४० क्युसेक थियो।

शनिबार बेलुका १० बजे सप्तकोशीको पानीको बहाव ६ लाख २० हजार क्युसेक मापन गरिएको थियो भने ११ बजे जलसतह खतरा तहभन्दा ११ दशमलव २६ मिटरमाथि पुगिसकेको थियो।

बाढीको वहाव अझ बढ्ने क्रममा रहेकाले सतर्कता अपनाउन अनुरोध गरिएको जनाएको छ। पानीको बहाव बढ्दै गएपछि शनिवार विहान ८ वजेदेखि नै कोशी ब्यारेजका सबै ५६ ढोका खोलिएका छन्।

सप्तकोशी नदी जलसतह खतरा तहभन्दा माथि पुगेको र अझै बढ्दो क्रममा रहेकाले उदयपुर, सुनसरी र सप्तरीका बाढीबाट कटान हुनसक्ने क्षेत्र तथा डुबान हुने होचा भूभागमा नबस्न र उच्च सतर्कताका साथ सुरक्षित स्थानमा जान सप्तकोशी चतरा जलमापन केन्द्रले सूचना जारी गरेको छ ।

लगातार पानीको बहाव बढ्दै गएपछि कोशी ब्यारेज भएर मानिस र सवारीसाधनको आवागमन शनिवार ४ वजेदेखि नै बन्द गरिएको छ।