राजविराज — सप्तरीको रुपनी गाउँपालिका–२, पौवामा विद्युतीय सिटी रिक्सा चार्ज गर्ने क्रममा करेन्ट लागेर एक दम्पतीको ज्यान गएको छ। मृत्यु हुनेमा स्थानीय ४५ वर्षीय बालेश्वर खंग मण्डल र उनकी ४२ वर्षीया श्रीमती रामकुमारी खंग छन्।

दुवै जनालाई कहिले करेन्ट लागेको हो भन्ने यकिन भइसकेको छैन। तर, स्थानीयवासी र प्रहरीको प्रारम्भिक अनुमान अनुसार गएराति रिक्सा चार्ज गर्ने क्रममा बालेश्वरलाई करेन्ट लागेको र उनलाई जोगाउन खोज्दा रामकुमारीलाई पनि करेन्ट लागेको हुन सक्ने आशंका गरिएको छ।

शुक्रबार बिहान दुवै जना घरमा नदेखिएपछि परिवारले खोजी गर्दा उनीहरू लडिरहेको अवस्थामा मृत फेला परेका थिए। इलाका प्रहरी कार्यालय रुपनीलाई स्थानीयवासीले बिहान करिब पौने ६ बजे खबर गरेका थिए।

प्रहरीले घटनास्थलको मुचुल्का तयार गरी शवलाई पोष्टमार्टमका लागि राजविराजस्थित गजेन्द्र नारायण सिंह अस्पतालमा पठाएको जनाएको छ।

इलाका प्रहरी कार्यालय रुपनीका सई तुलसी यादवका अनुसार मृतक दम्पतीका १८ र १० वर्षका दुई छोरा र एक बुहारी छन्। घटनापछि गाउँमा शोकको वातावरण छ।