विराटनगर– मोरङको विराटनगरमा सोमबार राति भएको हत्याको घटना केटी जिस्क्याएको विषयमा भएको खुलेको छ। घट्नामा संलग्न ४ जना पक्राउ परेका छन्।

प्रहरीका अनुसार कटहरी गाउँपालिका १ का २१ वर्षीय युवक करण कामतको हत्या भएको हो। उनको हत्या आरोपमा ताप्लेजुङका दावा शेर्पा, भोजपुरका सञ्जय पुरी तथा विराटनगरका सोनु गिरी र एक जना नाबालक छन्। शेर्पा र पुरी विराटनगरमै डेरा गरेर वसेका छन्।

विराटनगर महानगरपालिका– २ स्थित नेपाल टेलिकमको कार्यालय नजिकै सोमबार राती करिव १० बजे कामतसहित ३ जना घाईते अवस्थामा फेला परेका थिए। उनिहरुलाई बाटो हिड्नेहरुले उद्धार गरी कोशी अस्पताल भर्ना गराएका थिए। कामतको उपचारकै क्रममा मृत्यु भएको थिए।

घाईते भएका कटहरी–१ जमटोकीका २२ वर्षीय विक्रम मण्डल र १७ वर्षीय अमन रायलाई नोवेल मेडिकल शिक्षण अस्पतालमा सारिएको छ। कोखा र ढाडमा चोट लागेका दुवैको अवस्था गम्भीर रहेको जिल्ला प्रहरी कार्यालय मोरङले जनाएको छ।

बाटोमा हिँडिरहेका बेलामा केटी जिस्क्याएको विषयमा दुई समुहबीच विवाद हुँदा घटना भएको प्रहरीको प्रारम्भिक अनुशन्धानमा देखिएको छ। प्रहरीका अनुसार घटना भएकै स्थानमा एक दिन अघि (आइतबार) एक जना युवक (पक्राउ पर्ने एक युवकका आफन्त) किशोरी सँग गफ गरेर बसेका थिए। कामतको समूहले गफ गरेर बसेकी किशोरीलाई जिस्क्याएर गएको थियो।

भोलीपल्ट (सोमबार राती) त्यही विषयमा झगडा हुँदा हानाहान भएको देखिएको छ। त्यस क्रममा कैँची प्रहार गर्दा गम्भिर घाईते भएका कामतको मृत्यु भएको प्रहरीको भनाइ छ। उनको छाती र कम्मरको भागमा कैचीँ रोपेको फेला परेको छ।

यो पनि,

• विराटनगरमा मध्ये राती एक युवकको हत्या, २ जनाको अवस्था गम्भिर