दमक– दुईटा क्रसर उद्योग सञ्चालकबीच जग्गाको स्वामित्व विवादमा कुटाकुट हुँदा ६ कात्तिकमा दमक नगरपालिका–९ का देशु भनिने यामु निरौला (३७) को हत्या भयो। तर, १० दिन वितिसक्दा समेत घट्नाको अनुशन्धानमा प्रहरीले सकृयता देखाएको छैन।

घट्नामा सत्तारुढ दल नेकपा एमालेका कार्यकर्ता जोडिएपछि प्रहरीले अनुशन्धानमा अलमल गरिरहेको छ। पारिवारिक स्रोतका अनुसार मृतक निरौला पहिले जग्गा व्यवसायमा संलग्न थिए। पछिल्ला वर्षहरुमा जग्गा कारोबार ठप्पजस्तै हुँदा उनी फुर्सदिला थिए।

जग्गा कारोबारका क्रममा उनको ठेकेदारहरुसँग पनि चिनजान थियो। त्यही चिनजानका कारण दमक नगरपालिका–३, मावाखोला नजिकको जग्गामा रहेको पुरानो क्रसरको सामान बेचिदिन उनलाई प्रस्ताव आयो। फलाम सम्वन्धि काम गर्ने आफनो साथीसमेत रहेकाले उनले त्यसको जिम्मा लिए। त्यो सामान वेचेपछि थोरै भएपनि आन्दानी हुने उनको सोच थियो।

त्यो जग्गामा अर्को एउटा समूहले क्रसर चलाउन सामान राखिसकेको छ। तर, लामो समयदेखि काम भने अघि बढेको छैन। नयाँ समुहले क्रसर सञ्चालन गर्ने भन्दै पुरानो क्रसरको सामान हटाउन चासो गर्न थालेपछि उनी दिउँसो करिव साढे ४ बजे एस्काभेटर लिएर त्यहाँ पुगेका थिए।

तर, निरौला पुगेको जग्गामा दुई पक्षबीच पहिल्यैदेखि विवाद थियो। एउटा समूह ‘बैना दिइसकेकाले जग्गा हाम्रो हो’ भन्थ्यो भने अर्को समुहले ‘हामीले जग्गा खरिद गरिसकेको’ भन्दै विवाद गरिरहेका थिए।

त्यही क्रममा निरौला पुगेर फलाम उठाउन थालेपछि विवाद सुरु भएको प्रारम्भिक अनुसन्धानमा देखिएको छ। त्यसक्रममा ध्रुव गौतम, गणेश दर्जी, नम चेम्जोङ लगायतले उनलाई कुटपिट गरेको अनुशन्धान अधिकृतहरुको भनाइ छ। कुटपिटबाट गम्भीर घाइते भएपछि निरौलालाई प्रकाश कार्कीसहितकाले दमकस्थित आम्दा अस्पताल लगेका थिए।

अस्पताल पुर्‍याउनासाथ डाक्टरहरुले उनको मृत्यु भइसकेको बताएका थिए। हत्या भएपछि मृतककी पत्नी कृष्णमायाले इलाका प्रहरी कार्यालय दमकमा केही ब्यक्तिको नाम राखेर किटानी जाहेरी दिन खोजिन। तर, डीएसपी निशान थापाले कृष्णमायाको जाहेरी लिन मानेनन्। जाहेरीमा सत्तारुढ दल नेकपा एमालेका कार्यकर्ता बुद्धि थापाको नाम हटाउन उनले भने। बुद्धि एमाले प्रदेशसभा सदस्य होमबहादुर थापाका भाइ र एमाले झापा इन्चार्ज रोमनाथ ओलीका आफन्त हुन।

अनुशन्धानका क्रममा उपलब्ध सीसीटीभी फुटेजमा नम चेम्जोङ पनि कुटपिटमा संलग्न देखिएपछि जाहेरीमा उनको पनि नाम थपिएको छ। उनी आफैं एमालेको भातृ सङ्गठन युवासंघका पूर्व केन्द्रीय सदस्य हुन् भने प्रधानमन्त्री समेत रहेका एमाले अध्यक्ष केपी शर्मा ओलीका विश्वास पात्र हुन।

प्रहरीले नाम हटाएर जाहेरी दिन भनेपछि मृतकका आफन्त र समर्थकले दमकमा आन्दोलन गरे। निरन्तरको आन्दोलनपछि प्रहरी किटानी जाहेरी लिन तयार भए पनि पक्राउ गर्ने र कारवाही गर्ने विषयमा अलमल गरिरहेको मृतकका दाजु नवराजले वताए। जाहेरीमा नाम भएकाहरु अहिले पनि खुलेआम हिँडिरहेको उनले बताए।

झापा जिल्ला अदालतले हत्यामा संलग्नहरु विरुद्ध पक्राउपूर्जी जारी गरिसकेको छ। तर, प्रहरीले हालसम्म मोरङको उर्लाबारी–६ का प्रकाश कार्की (४२), उर्लाबारी–७ का ध्रुव गौतम (४९) र संखुवासभाको मादी नगरपालिका–१० घर भई दमक–३ बस्ने गणेश दर्जी (२६) लाई मात्रै पक्राउ गरेको छ। बुद्धि थापा, नम चेम्जोङ, दमक–३ का राजु भनिने शेरबहादुर नेम्बाङ र सुनसरीको इटहरीका डेबिड घले भने अझै फरार छन्।

जिल्ला प्रहरी कार्यालय झापाका डीएसपी कृष्णकुमार चन्दले घट्नाबारे अनुसन्धान भइरहेको बताए। उपलब्ध सीसीटिभीको फुजेट सङ्कलन गरी अध्ययन र विश्लेषण भईरहेको उनको भनाई छ। फरार आरोपीहरू पनि चाँडै पक्राउ पर्ने बताउँदै घटनास्थलबाट मे.१ च २३९९ र प्रदेश–१–०१–००१ च ८६३१ नम्बरको गाडीसमेत बरामद गरेको उनले जानकारी दिए।