राजधानी — दैलेखमा गत साउन ११ गते छामघाट खोलाको किनारमा मृत अवस्थामा फेला परेका २८ वर्षीय सुरेन्द्रबहादुर शाहीको मृत्यु सामान्य घटना नभई योजनाबद्ध हत्या भएको प्रहरीले पुष्टि गरेको छ।

वैदेशिक रोजगारीबाट ३३ महिनापछि घर फर्किएका शाहीलाई विवाह गर्ने आश्वासन दिई प्रेमिका भनिएकी युवती र उनका बुवाआमाले योजनाबद्ध रूपमा हत्या गरेको तथ्य प्रहरी अनुसन्धानबाट खुलेको हो।

दैलेख चामुण्डाबिन्द्रासैनी–६, लैनचौरका सुरेन्द्रबहादुर शाही रोजगारीका लागि सुरेन्द्र २०७९ असोज ३० गते मलेसिया गएका थिए। त्यही क्रममा उनको फेसबुकमार्फत दैलेख महाबु गाउँपालिका–५ काँसीकाधकी २७ वर्षीया गंगा वनसँग चिनजान भयो। दुई वर्षसम्म फेसबुकमै निरन्तर कुराकानी हुँदा उनीहरूबीच प्रेम सम्बन्ध गहिरिँदै गयो।

गंगाले विवाह गर्ने आश्वासन दिँदै सुरेन्द्रसँग आर्थिक लाभ उठाइन्। प्रहरी अनुसन्धानअनुसार विभिन्न बहानामा उनले सुरेन्द्रबाट करिब चार लाख ४६ हजार नौ सय २० रुपैयाँ ५३ पैसा रकम लिइन्।

धेरै रकम हात परेपछि गंगाले बिस्तारै सुरेन्द्रबाट टाढिन खोजिन्। उनले फेसबुकबाट सुरेन्द्रलाई अनफ्रेन्ड गरिन्, मोबाइलमा ब्लक गरिन्। सुरेन्द्र नेपाल फर्कने तयारीमा रहेको थाहा पाएपछि गंगाले पासपोर्ट बनाइ विदेश भाग्ने तयारी पनि गरिन। उनी विदेश भाग्न काठमाडौँसम्म पुगेकी थिइन्।

तर, असार ३२ गते नेपाल फर्किएका सुरेन्द्रले गंगासँग सम्पर्क गर्न उनकै आफन्तको सहायता खोजे। यही क्रममा २ साउनमा उनी गंगा र उनका बुवाआमासँग सम्पर्कमा पुगे। प्रहरी अनुसन्धानका अनुसार, गंगाका बुवा ६३ वर्षीय नैने र आमा ५६ वर्षीया भक्कुले ६ साउनमै सुरेन्द्रको हत्या गर्ने गर्ने योजना बनाई सकेका थिए। त्यसैले ‘गंगाको विवाह तपाईँसँग गरिदिन्छौँ’ भन्दै १० साउनमा सुरेन्द्रलाई बोलाए।

गंगाले सुरेन्द्रलाई महाबु–४ को काप्रिखोला र काँसीकाध जोड्ने रापटस्थित झोलुङ्गे पुलमा भेट्न बोलाइन्। राति ११ बजे भेटघाटको क्रममा विवाद भयो। त्यही क्रममा गंगाले सुरेन्द्रलाई पुलबाट खोलामा खसालिन्। शव भने भोलिपल्ट ११ साउन बिहान ६ बजे दुल्लु–११ कयलकुनास्थित छामघाट खोलाको किनारमा भेटियो।

शव फेला पर्दा उनको शरीरको तल्लो भाग नाङ्गो र माथिल्लो भागमा सेतो–खैरो टिसर्ट मात्र थियो। तत्काल पहिचान नभए पनि १२ साउनमा शव सुरेन्द्रको भएको पुष्टि भयो। शाहीको शव भेटिएपछि प्रहरीले अनुसन्धानलाई तिब्र गतिमा अघि बढायो।

सुराक र आफन्तका बयानका आधारमा १४ साउनमा गंगालाई पक्राउ गरियो। अनुसन्धान क्रमशः अघि बढ्दै जाँदा उनका बुवाआमासमेत प्रत्यक्ष संलग्न रहेको पत्ता लाग्यो। गंगाले प्रहरीसमक्ष दिएको बयानअनुसार, सुरेन्द्रलाई झोलुङ्गे पुलमै धकेली खोलामा खसालेर हत्या गरिएको हो। हत्याको योजना बुवाआमाले नै बनाएका थिए। त्यसैले उनीहरुलाई मतियारको मुद्दा चलाइएको छ।

जिल्ला प्रहरी कार्यालय दैलेखका प्रमुख डीएसपी गणेश बरालका अनुसार, अनुसन्धान प्रक्रिया पूरा भएपछि तीनै जनाविरुद्ध जिल्ला अदालतमा मुद्दा दर्ता गरिएको छ। गंगाविरुद्ध कर्तव्य ज्यान र आपराधिक लाभ दुवै मुद्दामा कारबाही माग गरिएको छ।

दैलेख जिल्ला अदालतका श्रेस्तेदार वीरेन्द्रबहादुर मल्लले प्रतिवादी गंगा वन, उनका बुवा नैने र आमा भक्कुलाई पुर्पक्षका लागि थुनामा राख्ने आदेश भईसकेको बताए। यो घटनाले दैलेखमा सनसनी मच्चाएको छ। एकातर्फ शाही परिवारले धरोहर जस्तो छोरा गुमाएको छ भने गंगाको परिवार नै जेलतर्फ धकेलिएको छ।

सुरेन्द्र र गंगा दुवै विवाहित
हत्या गरिएका शाही विवाहित हुन। ४ वर्षका छोरा तथा ६ र ८ वर्षका २ छोरी छोडेर एक वर्ष अघि श्रीमति डल्ली शाहीले गाउँकै अर्को पुरुषसँग विवाह गरेकी थिइन्। त्यसैले उनले गंगासँग विवाह गर्ने योजना बनाएका थिए।

गंगाले उनलाई आफु ‘अविवाहित’ रहेको वताएकी थिईन। तर, पछि उनी पनि विवाहित र छ वर्षको छोरी रहेको खुलेको थियो।