रौतहट– रौतहटको गौर–सिर्सिया खण्डको मुडबलवा गेट नजिक सुटकेसमा मृत फेला परेकी २६ वर्षीया रुबीकुमारी साहको हत्या गर्ने लक्ष्मण पासवान विवाहित र दुई सन्तानका पिता रहेको खुलेको छ।

श्रीमती, दुई छोरा र आमाबाबुसहितको परिवारको भविष्यलाई छोडेर लक्ष्मण प्रेमिका रुबीको पछि लागेको पाईएको छ। हालसम्मको अनुशन्धान र जानकारी अनुसार जयनाथ पासवानका एक्ला छोरा लक्ष्मण र परिवारकी माईली छोरी रुबी दुवै जना माधवनारायण नगरपालिका–६ स्थित माधोपुरका हुन। उनीहरुको घर करिव १ सय मिटरको दुरी भित्र छ। लक्ष्मण विपन्न परिवारका र रुवी मध्यम वर्गिय परिवारकी हुन।

रुबीका बाबु २०७० सालदेखि नै रोजगारीका निम्ति भारतको गुजरातमा छन्। रुबीको हत्या हुँदा समेत उनी भारतमै थिए। दुवै जना माधोपुर माविमा कक्षा ६ पढ्दादेखि साथी हुन। त्यतिबेलादेखि नै उनीहरु एक–अर्कालाई माया गर्थे। १० कक्षा पुग्दासम्म उनीहरुको प्रेम सम्वन्धका विषयमा स्कुलका साथी मात्र होईन, गाउँघर र परिवार सवै जानकार थिए।

लक्ष्मण र उनको परिवारलाई यस विषयमा रुबीको परिवारले पटक–पटक सचेत गराई सकेको थियो। दुई परिवारबीच द्वन्द्व चलिरहेको थियो। त्यसै कारण रुबीको परिवार २०६८ सालमा गाउँबाट बसाइँ सरेर सदरमुकाम गौरमा डेरा गरी बस्दै आएको थियो।

यसै क्रममा १० कक्षा पढ्दै गरेका १७ वर्षका लक्ष्मण र १६ वर्षकी रुबी २०६८ पुस २४ गते भागेर भारतको चण्डीगढ पुगे। उनीहरु सात महिनापछि २०६९ साउनमा गाउँ फर्किए। २०६९ साउन १५ गते सर्लाही जिल्ला अदालतबाट ‘कोर्ट म्यारिज’ गरेको उनीहरु बताउँथे। तर प्रहरी अनुसन्धानमा उनीहरुले नक्कली कागजात जुटाएर बिहे दर्ता गरेको देखिन्छ।

विवाह गरेर फर्किने बेलामा रौतहट प्रहरीले दुवैलाई पक्राउ गरेको थियो। रुबीको परिवारले लक्ष्मण, उनका काका बैजनाथ हजार र भिनाजु खजान्ची पासवानविरुद्ध अपहरण तथा शरीर बन्धक र मानव बेचबिखनमा प्रहरीमा मुद्दा दर्ता गरेका थिए। पक्राउ परेका लक्ष्मण १७ दिन हिरासतमा बसेर १५ हजार धरौटी बुझाई रिहा भए।

झन्डै २ वर्ष मुद्दा खेपेका लक्ष्मण, उनका काका र भिनाजुलाई २०७१ मंसिर २५ मा तत्कालीन न्यायाधीश राधाकृष्ण उप्रेतीको एकल इजलासले सफाइ दिएको थियो। लक्ष्मण पक्राउ परेको ६–७ महिनाभित्रै परिवारले रुबीको विवाह भारतको विहारस्थित मुजफ्फरपुर जिल्लाको रोक्साटोलका शिवसागर साहसँग गरिदियो। रुबीले बिवाह गरेपछि लक्ष्मणले पनि मागी बिवाह गरे। अहिले रुबीका ४ वर्षका छोरा तथा लक्ष्मणका ७ र ४ वर्षका छोरा छन्।

आर्थिक अवस्था कमजोर भएकै कारण लक्ष्मण २०७६ सालमा वैदेशिक रोजगारीका निम्ति मलेसिया पुगेका थिए। एक वर्षअघि बाबु जयनाथलाई प्यारालाइसिस भएपछि मलेसियामा कमाएको पैसा पनि उनले बाबुको उपचार र पुरानो ऋण तिर्नमै खर्च गरेका थिए।

करिव दुई महिनाअघि रुबी छोरा पढाउन भन्दै गौरस्थित माइतीको डेरा आएकी थिइन्। त्यसको दुई महिनाअघि लक्ष्मण मलेसियाबाट फर्किएर गौरस्थित बालमन्दिर पछाडिमा डेरा डेरा लिई वस्न थालेका थिए। उनीहरुको डेरा करिब डेढ किलोमिटरको दुरीमा थियो।

घटना भएको दिन शनिवार दिउँसो रुबी पार्लर पुगेकी थिइन्। उनीहरुबीचको कुराकानीपछि ४ बजेर ५५ मिनेटमा रुबी लक्ष्मणको डेरामा पुगेको प्रहरी अनुसन्धानमा देखिएको छ। प्रहरीले लक्ष्मणको डेराबाट केही तस्बिर समेत फेला पारेको छ। दुवैले ‘बर्थ डे सेलिब्रेट’ गरेको देखिएको छ। तर, बर्थडे कस्को हो ? भन्ने खुलेको छैन।

रुबी आईतबार चौरचन मनाउन भारतस्थित श्रीमान्को घर जाने तयारीमा थिइन्। तर, कोठामा भएको भेटघाटकै क्रममा लक्ष्मणले रुबीको घाँटी थिचेर हत्या गरे। प्रहरीका अनुसार हत्यापछि उनी शव व्यवस्थापनमा जुटे। शवलाई सुटकेसमा प्याक गरेर ई–रिक्सामा राखि बागमती नदीमा फाल्ने योजना बनाएको प्रहरी अनुसन्धानमा देखिएको छ।

ई–रिक्सा चालक राजकुमार महराले ५ सय रुपैयाँमा शव व्यवस्थापनको जिम्मा लिएका थिए। तर बाटोमा जाँदै गर्दा ई–रिक्साको चक्कामा समस्या देखियो। राजकुमारले अर्को ई–रिक्सा बोलाउन खोजेका थिए। तर लक्ष्मणले मानेनन्। त्यसपछि लक्ष्मणले शवसहितको निलो सुटकेस मुडबलवा गेट नजिकैको सडकमा छाडेर हिँडे। सडकमै सुटकेस फेला परेपछि यो घटना चाँडै सार्वजनिक भयो।

शनिवार राति नै सुटकेस फेला परे पनि प्रहरीले त्यसलाई खोलेन। आइतबार बिहान खोलेर हेर्दा सुटकेसभित्र रुबीको शव फेला पर्यो। त्यो देखेर प्रहरी नै आश्चर्यमा पर्‍यो। रुबीको हत्या कसले र किन ग¥यो ? भन्ने प्रहरीले खोजतलास गर्दैगर्दा लक्ष्मण भागेर सीमापारि भारतीय भूमि पुगे।

तीन दिन भारतमा बसेर उनी गाउँ आए। रुबीको हत्या गरेको स्विकार्दै सामाजिक सञ्जालमा करिव १० मिनेटको भीडीओ पोष्ट गरे। मंगलबार बिहान शरीरमा पेट्रोल छर्केर आत्महत्याको प्रयास गर्दैगर्दा स्थानीयले देखेर प्रहरीलाई खबर गरेका थिए।

प्रहरीले नियन्त्रणमा लिएर उपचारका निम्ति गरुडास्थित बेटर अस्पताल पुर्‍यायो। उपचारका क्रममा लक्ष्मणले ‘त्यस दिन डेरामा सम्बन्धकै विषयमा एक–अर्काबीच भनाभन भएको र त्यही क्रममा आफूले हत्या गरेको’ बताएका थिए।

त्यहाँ उपचार सम्भव नभएपछि उनलाई काठमाडौँको कीर्तिपुरस्थित बर्न अस्पताल लगियो। तर, उपचार सम्भव भएन। अनुहारसहित शरीरका अन्य भाग जलेर गम्भीर घाइते भएका उनको उपचारका क्रममा मृत्यु भयो।

यो पनि

• रुबी हत्या प्रकरणका आरोपी लक्ष्मण पासवानको मृत्यु
• रुबी साह हत्या प्रकरणः आमाले पैसावालसँग सुत्न बाध्य बनाएको र देवरले ब्ल्याकमेल गरेको आरोप
• हातमा रुबीको नामको ट्याटु, छातीमा उनकै फोटोः प्रेमीकाको हत्या गरेपछि लक्ष्मणको विलौना– अव म बाँचेर के गर्नु ?
• विद्यालयदेखिको प्रेम, कोर्ट म्यारिज, विछोड र हत्याः यस्तो छ रुबी साहको हत्या प्रकरणको नालीबेली
• रुबीको हत्या गौरमै भएको खुलासा, हत्या गरेर आरोपी लक्ष्मण पासवान फरार
• रुबीको हत्या प्रकरणः प्रेमीमाथि परिवारको शंका, शव बोक्न प्रयोग भएको इ–रिक्सा चालक पक्राउ
• रौतहटमा सुटकेसभित्र मृत फेला परेकी रुबीको भारतमै हत्या भएको आशंका, फेला परेन मोवाईल
• बन्द सुटकेसभित्र मृत फेला परिन रुबिकुमारी, सल र डोरीले बाँधेर कस्ले फाल्यो सडक किनारमा ?