काठमाडौँ– सुनसरीको दुहबी घर भएका एक दम्पती क्यानडाबाट नेपाल फर्किएको भोलिपल्टै आईतबार विहान काठमाडौँको एक ५ तले होटलमा मृत फेला परेका छन्।

काठमाडौं महानगरपालिका–९, सिनामंगलस्थित जन्मभूमि होटलको चौथो तलामा १२० नम्बरको कोठा बुक गरेर वसेका दुहवीका ३४ वर्षीय रमेश माझी र उनकी पत्नी २९ वर्षीया शर्मीलाको शव फेला परेको छ।

काठमाडौं प्रहरीका एसपी नवराज अधिकारीका अनुसार २ वर्षका छोरा बुबाआमासँग छोडेर सन २०२२ मा क्यानडा गएका उनीहरु शनिबार मात्रै नेपाल फर्किएका थिए। तर उनीहरु नेपाल फर्किएको कुरा सुनसरीमा रहेका बुबाआमालाई समेत जानकारी थिएन।

घटनास्थलबाट बरामद भएको पासपोर्टका आधारमा उनीहरु हिजै मात्र काठमाडौँ झरेको प्रहरीको पत्ता लगाएको हो। सिनामंगलको प्रकाश सन्यास आश्रम जाने बाटोस्थित पर्शुराम आचार्यको पाँच घर भाडामा लिएर खोटाङको दिक्तेल रुपाकोट नगरपालिका–४ का रामजी कटुवालले जन्मभूमि होटल सञ्चालन गरेका हुन।

सोही होटलमा बास बसेका उनीहरुको शव बरण्डाको रेलिङमा सेतो कपडाको सलको पासोमा झुण्डिएको अवस्थामा फेला परेको एसपी अधिकारीको भनाई छ। उनीहरुले आत्महत्या गरेको प्रारम्भिक अनुमान छ। तर, घटनास्थलमा कुनै सुसाइड नोट समेत फेला परेको छैन। थप कुरा अनुसन्धानपछि पत्ता लाग्ने उनले वताए।

काँडाघारी बस्ने होटल सञ्चालक कटुवालका अनुसार उनीहरु शनिबार साँझ होटलमा पुगेका थिए। उनीहरुले रमेशको नाममा कोठा ‘बुक’ गरेका छन्। उनीहरु क्यानडा सुनसरीमा छोडेका छोरा अहिले ४ वर्षका छन्।