काठमाडौँ— काभ्रेको बेथानचोक गाउँपालिका–६, भुग्देउमा बुधबार साँझ बस दुर्घटना हुँदा एक महिलाको मृत्यु भएको छ भने उनकी वुहारी र नातिनीसहित तीन जना घाइते छन।

पनौतीबाट भुग्देउतर्फ जाँदै गरेको बा ३ ख ४४३५ नम्बरको बस साँझ करिव ५ बजे दर्केखोलानजिकै सडकबाट करिब ५० मिटर तल खसेको हो।

बेथानचोक–६ का वडाध्यक्ष विष्णु लामाका अनुसार ६० वर्षीया कृष्णकुमारी तिमल्सिनाको घटनास्थलमै मृत्यु भएको हो। उनी आफ्नी नातिनी र बुहारीसँग बसमा सवार थिइन।

दुर्घटनामा परेर तिमल्सिनाकी एक वर्षीया नातिनी संगम र बुहारी संगीता आचार्य तिमल्सिना घाइते भएका छन। संगमको टाउकोमा र संगीताको खुट्टामा चोट लागेको छ।

यस्तै, बसका चालक पनि घाइते भएका छन। घाइतेहरूको स्थानीय पाँगु भुग्देउ स्वास्थ्य चौकीमा उपचार भइरहेको छ।

दुर्घटनाका बेला बसमा चालकसहित सात जना सवार थिए।