राजविराज– पूर्वमन्त्री एवम् नेकपा माओवादी केन्द्रका कन्द्रिय नेता उमेशकुमार यादवले जेन–जी आन्दोलनका क्रममा आफूलाई मार्ने सम्मको षड्यन्त्र भएको खुलासा गरेका छन्। साधारण प्रदर्शनबाट नियोजित रुपमा आफनो घर र सवारीमा आक्रमण भएको र त्यसको अध्ययन गर्दै जाँदा आफनो ज्याननै मार्ने लक्षित हमला भएको उनले खुलासा गरेका हुन।

यो घट्नाले राजनीतिक असहिष्णुता र योजनाबद्ध हिंसात्मक रणनीतिहरूको संकेत गरेको उनको भनाइ छ। निर्वाचन र पार्टीको आन्तरिक भावी प्रतिस्पर्धासँग जोडिएर आफुमाथि प्रतिशोधात्मक मनोवृत्ति र नियोजित हमला भएको दाबी उनको छ।

‘यो केवल भीडको उत्साह वा स्थानिक क्रोध मात्रै होइन — कुनै तहबाट भ्रामक सूचना, उतेजना र नेतृत्वहीन आन्दोलनको प्रवर्धन गरेर विशेष रुपमा टार्गेट गरिएको छ। यो तथ्यले आन्दोलनमा भाग लिने स्वयंसेवक र यसको नेतृत्वबीचको जिम्मेवारी र नियन्त्रित अभियानको प्रश्नलाई बलियो बनाएको छ।’– उनले भनेका छन्।

‘आन्दोलनका नाममा भएका कृयाकलाप स्वतः सिर्जित थिएनन, कुनै तहबाट निर्देशित क्रियाकलाप र जानकारीले परिस्थितिलाई खतरा बनाएको देखिन्छ’ उनले भनेका छन्–‘मेरै मात्र निवासमा किन आक्रमण गरियो।’

स्थानीय शुभचिन्तक र आम नागरिकको सक्रियताले थप ठूलो मानविय क्षति हुनबाट जोगिएको भन्दै उनले सहयोगीलाई धन्यावाद दिएका छन्। यादवले आन्दोलन आह्वान गर्ने नेताहरूलाई प्रश्न गरेका छन्–‘सप्तरी जस्तो संवेदनशील भूभागमा प्रदर्शनको दायित्व कसले लियो र किन नेतृत्वले व्यापक सुरक्षा व्यवस्थापन र समन्वयको व्यवस्था गरेन ?’

आन्दोलनको नाममा बालबालिका तथा आम सर्वसाधारणलाई खतरामा पारेर ठूलो राजनीतिक फाइदा लिन खोज्ने प्रयासले समाजमा दीर्घकालीन क्षति पु¥याउन सक्ने यादवले चेतावनी दिएका छन्। आफ्नो पार्टीप्रति गर्व र प्रतिबद्धता व्यक्त गर्दै उनले भनेका छन्–‘यो बिन्दुले आन्दोलन र व्यक्तित्वबीचको सीमारेखा, जिम्मेवारी र आलोचनात्मक दृष्टिकोणको आवश्यकता औंल्याउँछ।’ यादवले आफनो गाडीमाथि भएको आक्रमणको भीडीओसमेत सामाजिक सञ्जालमा शेयर गरेका छन्।

‘आफ्ना बालिकाको सुरक्षा र व्यवहारिक शिक्षा प्रति सचेत हुन हुनुहोला। ती बालबालिकालाई दोष दिनु भन्दा पहिले अभिभावक र समुदायले उनीहरूलाई उतेजित हुने किसिमका गतिविधिबाट बचाउनु आवश्यक छ, नत्र अर्को ठूलो मानवीय क्षति हुन सक्छ।’– उनले चेतावनी दिएका छन्।

घटनापछि यादवले प्रशासनिक र अनुसन्धान निकायहरूलाई समन्वयात्मक र पारदर्शी अनुसन्धान अघि बढाउन आग्रह गरेका छन्। नियोजित उतेजनाको शृंखला र तिनका स्रोतहरूको छानबिन गरेर दोषीहरूलाई कानुनी कार्वाहीमा ल्याउनुपर्ने उनको माग छ। राजनीतिक स्थायित्व र समाजिक सद्भाव कायम राख्न तत्काल रुपमा सुरक्षा उपाय, सत्यनिरुपण र सजगता आवश्यक रहेको उनको भनाई छ।