नवलपरासी— जेन–जी आन्दोलनपछि उत्पन्न अराजक अवस्थाका बीच मकवानपुरको भीमफेदी कारागारबाट फरार भएका एक कैदीको पूर्वी नवलपरासीमा हत्या भएको छ।

नवलपरासीका एसपी युवराज खड्काका अनुसार ७ देखि ८ जनाको समूहले २८ वर्षीय नारायण कुमालको शुक्रबार साँझ गैंडाकोट क्षेत्रमा हत्या गरेको हो। मृतक चितवनको कालिका नगरपालिका–४ पदमपुरका बासिन्दा हुन्।

हत्या प्रकरणमा संलग्न भएको आरोपमा पाँच जना पक्राउ परेको र थप अनुसन्धान भइरहेको प्रहरीले जनाएको छ। घटनास्थलमा सुराकीका आधारमा व्यापक खोजतलास गरिएको र अन्य सम्भावित संलग्न व्यक्तिहरूको पहिचान भइरहेको बताइएको छ।

कुमाल भदौ २४ गते भीमफेदी कारागारबाट अन्य कैदीहरूसँगै भागेका थिए। उनीमाथि बलात्कारको आरोपमा अदालतले १० वर्ष कैद र ३५ हजार रुपैयाँ जरिवानाको फैसला गरेको थियो। २०७४ साउन ३ गते पक्राउ परेका कुमाललाई अदालतको आदेशअनुसार कारागारमा राखिएको थियो।

फरार कैदीको हत्या भएपछि प्रहरी प्रशासनले यसलाई गम्भीर रूपमा लिएको छ। हाल नवलपरासी, चितवन र मकवानपुर प्रहरीबीच समन्वय गरी घटनाको पृष्ठभूमि, प्रतिशोध वा समूहगत आक्रोशका कोणबाट अनुसन्धान अघि बढाइएको जनाइएको छ।