फत्तेपुर– सप्तरीको सप्तकोशी नगरपालिका–१ फत्तेपुरस्थित रक्तमाला नमूना सामुदायिक वन उपभोक्ता समूहको २६औं वार्षिक साधारण सभा शनिवार सम्पन्न भएको छ। सभाको अध्यक्षता समितिका अध्यक्ष इन्द्रप्रसाद लुईटेलले गरेका थिए।

कुल ८५० जना उपभोक्तामध्ये ७ सयभन्दा बढीले उपस्थिती जनाएको साधारण सभामा २० वटा प्रस्तावमाथि छलफल गरी निर्णय लिइएको छ। सभाले समुदायिक वन संरक्षण, वातावरणीय सुधार, सामाजिक–आर्थिक विकास र स्थानीय उपभोक्ताको हितलाई प्राथमिकता दिने गरी निर्णयहरु गरेको छ।

सभामा आव ०८२/०८३ को वार्षिक कार्यक्रम र आव ०८१/०८२ को वार्षिक आय–व्यय प्रस्तुत गरियो। वन व्यवस्थापनमा काठ–दाउरा निकासी, बिक्री–वितरण र थिनिङ तथा प्रुनिङ कार्यलाई प्राथमिकतामा राख्ने निर्णय गरिएको छ।

साथै, जडिबुटी खेती विस्तार, खहरे तथा पूर्वाधार सुधार, सिंचाई व्यवस्था, नर्सरी स्थापना, गरिबी न्यूनिकरण, शिक्षा र स्वास्थ्य क्षेत्रमा लगानी, सामुदायिक वन क्षेत्र घेराबेरा, सामाजिक सचेतना र विकासका कार्यक्रम सञ्चालन गर्ने निर्णय गरिएको छ।

यसैगरी, वन क्षेत्रमा रहेका बाँस हटाउने, कर्मचारी व्यवस्थापन गर्ने, पर्यटन पार्क प्रवेश शुल्क निर्धारण गर्ने, संघसंस्था तथा सरकारी निकायबाट अनुदान लिने, र उपभोक्ताको बीमा गर्ने विषयमा पनि निर्णयहरू भएका छन्।