काठमाडौँ– अमेरिकाको फ्लोरिडा राज्यस्थित सेन्ट पिटर्सबर्गको एक बार–रेस्टुरेन्टमा शौचालयभित्र यौनसम्बन्ध राखेको आरोपमा सोधपुछ भइरहेका बेला व्यवस्थापकमाथि थुकेको अभियोगमा १९ वर्षीया युवती पक्राउ परेकी छन्। प्रहरीले घटनामा संलग्न हेली सेरबललाई सामान्य कुटपिट (मिस्डिमिनर ब्याट्री) सम्बन्धी आरोपमा नियन्त्रणमा लिएर मुद्दा दर्ता गरेको छ।

प्रहरीका अनुसार घटना गत शनिबार बिहान सेन्ट पिटर्सबर्गस्थित शिसो क्रिस्पी नामक बार तथा रेस्टुरेन्टमा भएको हो। रेस्टुरेन्टका कर्मचारीहरूले सेरबल शौचालयभित्र एक पुरुषसँग यौनसम्बन्ध राखिरहेको आरोपपछि उनलाई सोधपुछ गर्दै बाहिर लैजान खोजेका थिए।

त्यही क्रममा सेरबलले अचानक फर्किएर रेस्टुरेन्टकी व्यवस्थापक कालीना कोन्क्लिनको अनुहारमा थुकेको आरोप लगाइएको प्रहरीले जनाएको छ। घटनाको जानकारी पाएपछि पुगेको प्रहरी टोलीले व्यवस्थापकको अनुहारमा थुक लागेको स्पष्ट देखिएको र घटनाका धेरै प्रत्यक्षदर्शीले पनि यही विवरण पुष्टि गरेको जनाएको छ।

प्रहरीले त्यसपछि सेरबललाई मिस्डिमिनर ब्याट्री अर्थात् सामान्य कुटपिटसम्बन्धी अभियोगमा पक्राउ गरेको थियो। अदालतको प्रक्रियापछि उनी एक हजार अमेरिकी डलर धरौटीमा रिहा भएकी छन्।

यस घटनामा उनीमाथि लागेको आरोप शौचालयभित्र भएको कथित यौनसम्बन्धका कारण होइन, व्यवस्थापकमाथि थुकेको आरोपका आधारमा दर्ता गरिएको प्रहरीले स्पष्ट पारेको छ। यसैबीच, द स्मोकिङ गनका अनुसार सेरबल यसअघि पनि कानुनी विवादमा परेकी थिइन्। उनी हाल दुईवटा छुट्टाछुट्टै फौजदारी मुद्दाकी प्रतिवादी रहेको जनाइएको छ।

तीमध्ये एउटा मुद्दा सवारीसाधन चोरीसँग सम्बन्धित छ भने अर्को हतियार प्रयोग गरी गरिएको गम्भीर आक्रमणपछिको घटनामा सहयोग गरेको आरोपसँग सम्बन्धित रहेको उल्लेख गरिएको छ। प्रहरीले हालको घटनाबारे थप कानुनी प्रक्रिया सम्बन्धित अदालतमार्फत अगाडि बढिरहेको जनाएको छ।