काठमाण्डौं– बालुवा गिट्टी उत्खनन्को विषयमा विवाद हुँदा बाँकेको बैजनाथ गाउँपालिका–७ प्रशुरामपुरमा २ जना युवामाथि खुकुरी प्रहार भएको छ। खुकुरी प्रहार गरेको आरोपमा राप्ती सोनारी गाउँपालिका–२ का वडाध्यक्षसहित ४ जना पक्राउ परेका छन्।

खुकुरी प्रहारबाट स्थानीय २८ वर्षीय सुलभ मल्ल र राप्ती सोनारी गाउँपालिका–२ का २८ वर्षीय सन्दिप बिष्ट गम्भीर घाइते भएका छन्। घाइतेमध्ये मल्लको बायाँ कोखामा र बिष्टको दुवै हातको कुममा गहिरो चोट छ। बिष्टभन्दा मल्लको अवस्था गम्भीर रहेको प्रहरीले जनाएको छ।

घाइतेलाई उपचारका लागि भारतको लखनउ रिफर गरिएको स्रोतले बताएको छ। शनिबार बेलुकी करिव ८ बजे राप्ती सोनारी गाउँपालिका–२, बिलौना चोकमा विष्ट र मल्लमाथि खुकुरी प्रहार भएको जिल्ला प्रहरी कार्यालयका एसपी तुलबहादुर कार्कीले बताए।

प्रहरीले राप्ती सोनारी गाउँपालिका–२ का वडाध्यक्ष ज्ञानेन्द्र वली (ज्ञानु वली) सहित ४ जनालाई पक्राउ गरेको छ। वडाध्यक्ष वली नेकपा (एमाले) निकट युवा संघ बाँकेका अध्यक्ष हुन्। एसपी कार्कीका अनुसार यी दुवै समूह विगतदेखि नै खोलामा बालुवा–गिट्टीको काम गर्ने समूह रहेको प्रारम्भिक अनुसन्धानबाट खुलेको छ।