काठमाण्डौं– डोटीको दीपायल सिलगढी नगरपालिका–६ का एक युवकले लागु पदार्थ नदिएको झोंकमा घाँटीमा मुड्कीले हाने ७५ वर्षीय वृद्धको हत्या गरेको खुलेको छ।

स्थानीय कालुसिंह विष्टको शव बिहीबार आफ्नै घरको कोठामा भेटिएको थियो। सम्पर्कविहिन भएको ३ दिनपछि वाहिरबाट ताल्चा लागेको कोठा खोलेर हेर्दा उनी मृत भेटिएका थिए। वृद्धको हत्या आरोपमा प्रहरीले सोही ठाउँका २२ वर्षीय सरोवर श्रेष्ठलाई पक्राउ गरेको थियो।

उनले चरेश (लागु पदार्थ) नदिएको झोँकमा वृद्धको हत्या गरेको प्रहरीको प्रारम्भिक अनुसन्धानबाट खुलेको छ। ‘चरेश लिन त्यहाँ गएको थिएँ। चरेश दिएनन्। हातले घाँटीमा हानेर ढालेँ। त्यसपछि लात्तले कुटेर मरेपछि कोठामा ताला लगाएर भागेँ।’– श्रेष्ठले प्रहरीसँगको बयानमा भनेका छन्।

घटनापछि फरार भएका उनलाई कैलाली स्थित सेती प्रादेशिक अस्पतालभित्र सुतिरहेको अवस्थामा पक्राउ गरिएको थियो। वृद्धको हत्याअघि पनि उनी कैलालीमा कुटपिट घटनामा संलग्न रहेको प्रहरी वताएको छ।

कैलालीको भजनी नगरपालिका–१ का ३५ वर्षीय लालबहादुर चौधरीमाथि गत ११ भदौको राति धनगढीको उत्तरबेहडीमा सडकमा कुटपिट गर्दै लुटपाट गरिएको थियो। उक्त घटनामा श्रेष्ठको पनि संलग्नता रहेको आशंकामा कैलाली प्रहरीले उनको खोजी गरिरहेको थियो।

यसैक्रममा हत्या घटनामा शंकास्पद भन्दै डोटी प्रहरीले हुलिया पठाएपछि कैलाली प्रहरीले उनलाई खोजेर पक्राउ गरेको हो।