‘स्कुलमा बम छ, ४ बजे पड्किन्छ’ भन्दै प्रहरीलाई फोन गर्ने महोत्तरीका युवक पक्राउ
शीर्ष खबर 
काठमाडौँ– प्रहरीको कण्ट्रोल रुममा फोन गरी ‘विभिन्न शैक्षिक संस्थामा बम राखेको छ, ४ बजे पड्किन्छ’ भन्दै झूटा सूचना फैलाएको आरोपमा प्रहरीले महोत्तरीका एक युवकलाई पक्राउ गरेको छ।
प्रहरीको कन्ट्रोल रुमको १०० नम्बरमा फोन गर्ने महोत्तरी गाउँपालिका–२ का ३८ वर्षीय जयरुद्र झालाई काठमाडौं उपत्यका अपराध अनुसन्धान कार्यालयको टोलीले कीर्तिपुरबाट पक्राउ गरेको हो।
प्रहरीका अनुसार, १३ भदौ दिउँसो झाले कन्ट्रोल रुममा फोन गरी विभिन्न शैक्षिक संस्थामा बम राखिएको र दिउँसो ४ बजे विस्फोट हुने दाबी गरेका थिए। उनले दिएको सूचनाले विद्यार्थी, शिक्षक र अभिभावकमा त्रास फैलिएको थियो।
सूचना पाउँनासाथ प्रहरी टोली तत्कालै सक्रिय बनेको थियो। तर, प्रारम्भिक अनुसन्धानमै घटनामा कुनै सत्यता नभएको पुष्टि भएपछि उनलाई खोजी गरी पक्राउ गरिएको हो।
प्रहरीले झाले यस्तो झूटा हल्ला किन र कसरी फैलाए भन्नेबारे थप अनुसन्धान भइरहेको जनाएको छ। पक्राउ परेका उनलाई आवश्यक कारबाहीका लागि जिल्ला प्रहरी परिसर काठमाडौं पठाइएको छ।
