काठमाडौँ– भारतको गुजरातीसथत अहमदाबादबाट लण्डनको ग्याटविकका लागि उडेको एअर इण्डियाको बोइङ ७८७ ड्रीमलाइनर विमान दुर्घटनामा परी हालसम्म २०४ जनाको मृत्यु भएको पुष्टि भएको छ।

१२ जना चालक दलका सदस्यसहित कुल २४२ जना सवार रहेको विमानका ३७ जना यात्रु तथा चालक दलका सदस्यहरूको चिन्ताजनक अवस्थामा उपचार भईरहेको छ। तर, यस दुर्घटनामा एक यात्रु रमेश विश्वास कुमार भने चमत्कारिक रूपमा जीवित र होसहवासमै फेला परेका छन्।

अस्पतालमा उपचार गराइरहेका कुमारले भारतीय सञ्चारमाध्यम आजतकसँग कुरा गर्दै ‘विमान दुर्घटना भएलगत्तै ठूलो विस्फोट भयो। चारैतिर आगोको लप्का थियो। एम्बुलेन्सले मलाई तत्काल अस्पताल ल्यायो। अहिले पनि म आफू जीवित छु भन्नेमा विश्वास गर्न सकिरहेको छैन। यो मेरो लागि कुनै चमत्कारभन्दा कम छैन।’ भन्दै प्रतिक्रिया दिएका छन्।

विमान बिहीबार दिउँसो १ः३९ बजे टेकअफ गरेको केही मिनेटमै अहमदाबादको मेघानी नगरस्थित बीजे मेडिकल कलेजको मेस भवनमा ठोक्किएको थियो। त्यसपछि विमान नजिकैको अतुल्यम नामक छात्रावाससँग ठोक्किँदा ठूलो आगलागी भएको थियो। आगोका कारण विमान पूर्ण रूपमा ध्वस्त भएको थियो।

अहमदाबाद प्रहरी कमिश्नर जीएस मलिकले दुर्घटनाको पुष्टि गर्दै दुर्घटना निकै भयानक रहेको बताए। ‘घटनास्थलको अवस्था हेर्दा कसैको बच्ने सम्भावना निकै न्यून थियो। रमेश विश्वास जिवित रहनु एकदमै असाधारण हो।’ उनले भने।

हाल घटनास्थलमा प्रहरी, सेना र उद्धार टोलीहरू खटिएका छन्। उद्धार र खोजी कार्य जारी रहेको अधिकारीहरूले जनाएका छन्। विमान दुर्घटनाको कारणबारे प्रारम्भिक अनुसन्धान सुरु भइसकेको छ।

अधिकारीहरूका अनुसार दुर्घटनापछि घटनास्थलमा चारैतिर धुवाँ र विमान र भवनका भग्नावशेस फैलिएको थियो। विमान टेकअफ गरेपछि प्राविधिक समस्या देखिएको आशंका गरिएको छ तर विस्तृत विवरण आउन बाँकी छ।