रौतहट– रौतहटमा वैवाहिक विवादको लामो श्रृंखला अन्ततः रक्तरञ्जित घटनामा परिणत भएको छ। फतुवा विजयपुर नगरपालिका–६ पेटभरवामा ३५ वर्षीया आरतीदेवी यादव आफ्नै शयनकक्षमा धारिलो हतियारले निर्ममतापूर्वक हत्या गरिएको अवस्थामा फेला परेकी छन्। प्रारम्भिक अनुसन्धानले उनका ४५ वर्षीय श्रीमान महन्थ राय यादवमाथि हत्या गरी फरार भएको आशंका छ।

स्थानीय तहका जनप्रतिनिधिहरूका अनुसार यादव दम्पतीबीच लामो समयदेखि सम्बन्ध तनावग्रस्त थियो। महन्थ गाउँ नजिकै सानो होटल सञ्चालन गर्दै आएका थिए भने आरती विगत केही वर्षदेखि घर छाडेर वीरगञ्ज, जीतपुर, सिमरा र चन्द्रपुरलगायत स्थानमा बस्दै आएकी थिइन्। उनी उद्योगमा काम गर्ने भन्दै बाहिर बस्दै आएको खुलेको छ।

यसबीच दम्पतीबीचको खटपट गहिरिँदै गएको थियो। करिब डेढ वर्षपछि पाँच दिनअघि मात्र घर फर्किएकी आरतीको जीवन यसरी अन्त्य होला भन्ने कसैले कल्पना गरेका थिएनन्। शनिबार राति दुवै जना घरमा सँगै रहेको बताइन्छ। तर आइतबार बिहान ११ बजेसम्म घरको ढोका नखुलेपछि छिमेकीहरू सशंकित बने।

स्थानीयले प्रहरीलाई खबर गरेपछि इलाका प्रहरी कार्यालय सन्तपुर दोस्तियाबाट खटिएको टोलीले जनप्रतिनिधिको उपस्थितिमा ढोका खोलेको थियो। भित्रको दृश्य त्रासदीपूर्ण थियो—आरती आफ्नै सुत्ने कोठामा मृत अवस्थामा थिइन्, घाँटी र टाउकोमा धारिलो हतियारले प्रहार गरिएको चोट।

घटनास्थलबाट बञ्चरो र दाउ बरामद भएको छ, जसले हत्या योजनाबद्ध र क्रूर भएको संकेत दिन्छ। घटनापछि महन्थ फरार भएका छन्। वडा अध्यक्ष राम एकवाल यादवका अनुसार फोन सम्पर्क हुँदा उनले श्रीमतीको चरित्रमाथि आरोप लगाउँदै हत्या गरेको स्वीकार गरेका थिए र र प्रहरीसमक्ष आत्मसमर्पण गर्ने बताएका थिए। तर उनी फरार भए।

प्रहरी प्रमुख सीताराम रिजालले दम्पतीबीच लामो समयदेखि विवाद रहेको प्रारम्भिक अनुसन्धानबाट खुलेको बताए पनि घटनाको वास्तविक कारणबारे औपचारिक निष्कर्षमा पुग्न बाँकी रहेको स्पष्ट पारे। शव पोष्टमार्टमका लागि प्रादेशिक अस्पताल गौरमा राखिएको छ र फरार अभियुक्तको खोजी तीव्र बनाइएको प्रहरीले जनाएको छ।