काठमाडौँ– उज्ज्वल भविष्यको सपना बोकेर अध्ययनका लागि क्यानडा पुगेका दुई नेपाली विद्यार्थीको जीवन त्यहीँ अन्त्य भएको छ। ओन्टारियो प्रान्तस्थित हाइवे ४०० मा भएको भीषण सडक दुर्घटनापछि गाडीमा आगलागी हुँदा भोजपुरकी २२ वर्षीया लाक्पा याञ्जी शेर्पा र कास्कीका राजीव श्रेष्ठको घटनास्थलमै मृत्यु भएको छ।

दीक्षान्त समारोह सकेर फर्किने क्रममा भएको यो दुर्घटनाले नेपाली विद्यार्थी समुदायलाई शोकमा डुबाएको छ। दुर्घटना जुन ११ तारिख बिहीबार बिहान करिब ३ बजेतिर हाइवे ४०० को उत्तरतर्फ जाने लेनमा भएको हो। स्थानीय प्रहरीका अनुसार चलिरहेको एसयुभी गाडी अचानक दुर्घटनामा परेको थियो र त्यसपछि गाडीमा आगलागी भएको थियो। आगोले गाडी पूर्ण रूपमा जलेपछि भित्र रहेका दुई जनाको घटनास्थलमै मृत्यु भएको पुष्टि गरिएको छ।

मृतकमध्ये भोजपुरकी लाक्पा याञ्जी शेर्पा नर्सिङकी विद्यार्थी थिइन्। उनी टोरन्टोस्थित फ्लेमिङ कलेजबाट नर्सिङ अध्ययन पूरा गरी भर्खरै दीक्षान्त समारोहमा सहभागी भएकी थिइन्। कास्कीका राजीव श्रेष्ठ टोरन्टोको महक कलेजमा आइटी अध्ययन पूरा गरेका थिए।

गैरआवासीय नेपाली संघ (एनआरएनए) क्यानडाका अनुसार लाक्पा र राजीव दुवै जना जुन ९ र १० तारिखमा सम्पन्न दीक्षान्त समारोहमा सहभागी भएर घर फर्किने क्रममा थिए। दीक्षान्तको खुसी र सफलताको क्षण केही घण्टामै शोकमा परिणत भएको हो।

एनआरएनए क्यानडाका अध्यक्ष जगन सापकोटाका अनुसार दुवै विद्यार्थीको शव हाल टोरन्टोस्थित अस्पतालमा राखिएको छ। लाक्पाको शव नेपाल पठाउने प्रक्रिया सुरु गरिएको छ भने राजीवको अन्त्येष्टिबारे परिवारसँग छलफल भइरहेको छ।

प्रहरी स्रोतलाई उद्धृत गर्दै क्यानडियन सञ्चारमाध्यमहरूले जनाएअनुसार दुर्घटनापछि गाडीमा आगो तीव्र रूपमा फैलिएको थियो, जसका कारण उद्धार सम्भव हुन सकेन। ओन्टारियो प्रान्तीय प्रहरी (इएए) को ट्राफिक युनिटले घटनाको विस्तृत अनुसन्धान सुरु गरेको छ।

दुर्घटना भएको स्थान सिक्स माइल लेक प्रादेशिक पार्कको उत्तर र मस्कोका रोड ३८ भन्दा केही दक्षिणमा पर्छ। यो क्षेत्र ब्यारीबाट करिब ७५ किलोमिटर तथा टोरन्टोबाट करिब १६० किलोमिटर उत्तरमा अवस्थित छ।

घटनापछि सम्बन्धित राजमार्ग केही घण्टाका लागि बन्द गरिएको थियो। अनुसन्धानका क्रममा दुर्घटनाको कारण, गाडीको गति, सडक अवस्था तथा प्राविधिक पक्षहरू अध्ययन भइरहेको प्रहरीले जनाएको छ।

विद्यार्थी भिसामा क्यानडा पुगेर अध्ययन पूरा गरेपछि रोजगारी र भविष्य निर्माणको तयारीमा रहेका दुई युवा एकैसाथ दुर्घटनामा पर्नु नेपाली समुदायका लागि अत्यन्त पीडादायी घटना बनेको छ। दीक्षान्तको उत्सवलाई शोकमा बदल्ने यो दुर्घटनाले विदेशमा अध्ययनरत नेपाली विद्यार्थीहरूको सुरक्षा र जोखिमबारे पनि गम्भीर प्रश्न उठाएको छ।