छठ घाट तोडफोड गरेर धार्मिक आस्थामाथि प्रहार, तर रोकिएन छठको उत्साह ! रातारात बने करिब १०० पूजास्थल, दुई युवा पक्राउ

इटहरी— धार्मिक आस्थामाथि प्रहार गर्ने उद्देश्यले छठ पूजास्थलमा तोडफोड गरिएको घटनाले स्थानीय क्षेत्रमा तनाव बढ्न सक्ने आशंका पैदा गरे पनि हरिनगरमा श्रद्धालुको उत्साह रोकिएन। तोडफोडबाट क्षतिग्रस्त घाटमा प्रहरी र स्थानीयवासी रातारात खटिएर करिब एक सयवटा पूजास्थल तयार पारेपछि सोमबार बिहान व्रतालुहरूले उदाउँदो सूर्यलाई अर्घ दिएर शान्तिपूर्ण रूपमा छठपूजा सम्पन्न गरेका छन्।

सुनसरीको हरिनगर गाउँपालिका–६ स्थित टपरा अर्नमा घाटमा छठ पूजास्थल तोडफोड गरेको आरोपमा प्रहरीले दुई जनालाई पक्राउ गरेको छ। पक्राउ पर्नेमा स्थानीय १९ वर्षीय रिजवान मन्सुरी र २१ वर्षीय मोहम्मद जहुर मियाँ छन्।

जिल्ला प्रहरी कार्यालय सुनसरीका अनुसार उनीहरूलाई घटनामा संलग्न रहेको आरोपमा नियन्त्रणमा लिएर अनुसन्धान अघि बढाइएको छ। प्रहरीले जारी गरेको प्रेस विज्ञप्तिमा कात्तिक २९ गते साँझ करिब साढे ७ बजे तोडफोड भएको उल्लेख छ।

प्रहरीका अनुसार भक्तजनहरूले अस्ताउँदो सूर्यलाई अर्घ दिएर पूजा सम्पन्न गरी घर फर्किसकेपछि अपरिचित व्यक्तिहरूले घाटमा तोडफोड गरेका थिए। घटनाबाट पूजास्थलमा क्षति पुगेपछि छठपूजा प्रभावित हुने र स्थानीय समुदायबीच तनाव बढ्न सक्ने आशंका गरिएको थियो।

तर, तोडफोडपछि पनि छठपूजा रोकिएन। क्षतिग्रस्त घाटलाई पुनः सञ्चालनमा ल्याउन प्रहरी र स्थानीयवासी रातारात जुटे। उनीहरूले भत्किएका संरचना मर्मत गर्नुका साथै करिब एक सयवटा पूजास्थल तयार पारे। त्यसपछि बिहानैदेखि व्रतालु तथा श्रद्धालुहरू घाटमा भेला भएर परम्पराअनुसार उदाउँदो सूर्यलाई अर्घ दिए।

प्रहरीले पनि घटनापछि श्रद्धालु भक्तजनलाई निर्धक्क भएर पूजामा सहभागी हुन आग्रह गरेको थियो। जिल्ला प्रहरी कार्यालयका सूचना अधिकारी प्रहरी नायब उपरीक्षक चन्द्रबहादुर खड्काका अनुसार क्षतिग्रस्त पूजास्थल पुनर्निर्माण गरी पूर्ववत् अवस्थामा ल्याइएको थियो।

देवानगञ्जको घटनापछि फेरि सामुदायिक तनावको जोखिम
हरिनगरमा छठ घाट तोडफोडको घटना यस्तो समयमा भएको छ, जतिबेला सुनसरी र आसपासका जिल्लामा सामुदायिक विवादले हिंसात्मक रूप लिन सक्ने अवस्था देखिइसकेको छ।

यसअघि गत १० साउनमा सुनसरीको देवानगञ्ज गाउँपालिका–३ कप्तानगञ्जमा दुई समुदायबीच झडप भएको थियो। झडप नियन्त्रण गर्ने क्रममा प्रहरीले गोली चलाउँदा एक जनाको घटनास्थलमै मृत्यु भएको थियो। गोली लागेर गम्भीर घाइते भएका थप दुई जनाको अस्पतालमा उपचारका क्रममा मृत्यु भएपछि उक्त घटनामा ज्यान गुमाउनेको संख्या तीन पुगेको थियो। झडपमा प्रहरी र प्रदर्शनकारीसहित तीन दर्जनभन्दा बढी घाइते भएका थिए।

देवानगञ्जको घटनापछि उत्पन्न तनाव सुनसरीमा मात्र सीमित रहेन। घटनाको विरोधमा सिरहाको गोलबजारलगायतका स्थानमा प्रदर्शन चर्किएको थियो। गोलबजारमा भएको प्रदर्शनका क्रममा प्रहरीको गोली लागेर एक जनाको मृत्यु भएको थियो। प्रदर्शनले उग्ररूप लिएपछि विभिन्न स्थानमा कर्फ्यु लगाउनुपरेको थियो।

हिंसात्मक प्रदर्शनका क्रममा करोडौँ रुपैयाँ बराबरका सवारीसाधन तथा भौतिक संरचनामा तोडफोड र आगजनी भएको थियो। घर, पसल र व्यावसायिक प्रतिष्ठानमा क्षति पुगेपछि व्यापार व्यवसाय प्रभावित भएको थियो। असुरक्षा र त्रासका कारण कतिपय स्थानीयले घरबस्ती छाडेर सुरक्षित स्थानमा आश्रय लिनुपरेको थियो।

यस्तो पृष्ठभूमिमा धार्मिक आस्थासँग जोडिएको छठ पूजास्थलमा भएको तोडफोडलाई सामान्य घटनाका रूपमा मात्र लिन सकिँदैन। धार्मिक स्थलमा हुने तोडफोडले समुदायबीच अविश्वास र प्रतिशोधको भावना बढाउन सक्ने भएकाले घटनाको संवेदनशीलता अझ बढी छ।

दोषीमाथि कारबाही र सद्भाव कायम राख्नु चुनौती
हरिनगरको घटनापछि प्रहरी र स्थानीयवासीले देखाएको सहकार्यले उत्तेजना र प्रतिशोधभन्दा माथि उठेर धार्मिक तथा सामाजिक सद्भाव जोगाउन सकिने सन्देश दिएको छ। क्षतिग्रस्त घाटलाई रातारात पुनर्निर्माण गरेर छठपूजा सम्पन्न गराउनु स्थानीय एकता र सामूहिक पहलको उदाहरण बनेको छ।

यद्यपि, पूजास्थल तोडफोडमा संलग्न रहेको आरोपमा दुई जना पक्राउ परे पनि घटनाको वास्तविक कारण र पृष्ठभूमि अनुसन्धानबाट स्पष्ट हुन बाँकी छ। तोडफोड योजनाबद्ध थियो वा अन्य कुनै कारणले भएको थियो भन्ने विषयमा प्रहरीले अनुसन्धानबाट तथ्य सार्वजनिक गर्नुपर्नेछ।

देवानगञ्ज घटनाले निम्त्याएको जनधनको क्षति र त्यसपछि फैलिएको तनावको पृष्ठभूमिमा हरिनगरको घटनालाई प्रशासनले गम्भीरतापूर्वक लिन आवश्यक छ। धार्मिक आस्थामाथि हुने आक्रमण रोक्नु, निष्पक्ष अनुसन्धान गरी दोषीमाथि कानुनी कारबाही गर्नु र समुदायबीच विश्वास कायम राख्नु अहिले प्रहरी तथा स्थानीय प्रशासनका मुख्य जिम्मेवारी हुन्।


प्रतिक्रिया

Leave a Reply

Your email address will not be published. Required fields are marked *

लोकप्रिय

ताजा अपडेट