धरान — सुनसरीको धरान उपमहानगरपालिका–११ स्थित पुण्यमार्गमा मंगलबार साँझ भएको धारिलो हतियार आक्रमणले एक व्यक्तिको ज्यान गएको छ। आफ्नै घरभित्र खुकुरी प्रहारबाट ३५ वर्षीय रूपक राईको घटनास्थलमै मृत्यु भएको हो।

इलाका प्रहरी कार्यालय धरानका अनुसार मंगलबार साँझ करिब साढे ६ बजे राईमाथि खुकुरी प्रहार भएको सूचना पाएलगत्तै प्रहरी टोली घटनास्थल पुगेको थियो। प्रारम्भिक अनुसन्धानमा उनको टाउकोसहित शरीरका विभिन्न भागमा पटक–पटक धारिलो हतियारले प्रहार गरिएको पाइएको छ। गम्भीर चोटका कारण उपचारको अवसर नै नपाई उनको घटनास्थलमै मृत्यु भएको प्रहरीले जनाएको छ।

घटनास्थलको मुचुल्का उठाएर शवलाई पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान (घोपा) पठाइएको छ। घटनाको प्रकृति हेर्दा हत्या नियोजित हो वा आपसी विवादको उत्कर्ष हो भन्ने विषयमा अनुसन्धान केन्द्रित गरिएको प्रहरीको भनाइ छ।

प्रहरीले घटनामा संलग्न भएको आशंकामा मृतकसँगै सोही घरमा बस्दै आएका उनका मामाका छोरा ३३ वर्षीय रविन राईलाई नियन्त्रणमा लिएको छ। इलाका प्रहरी कार्यालय धरानका डीएसपी भीषणबाबु राईका अनुसार प्रारम्भिक अनुसन्धानका क्रममा रविन शंकास्पद देखिएपछि उनलाई तत्काल नियन्त्रणमा लिइएको हो। हाल उनलाई प्रहरी कार्यालयमा राखी गहन सोधपुछ भइरहेको छ।

रूपक र रविनबीच के विषयलाई लिएर विवाद भयो र त्यो विवाद कसरी हत्या सम्म पुग्यो भन्ने विषय अझै स्पष्ट भइनसकेको प्रहरीले जनाएको छ। घटनाको कारण, खुकुरी प्रयोगको अवस्था र घटनाक्रमको पूर्ण विवरण थप अनुसन्धानपछि मात्र खुल्ने प्रहरीको भनाइ छ।