विराटनगर — मोरङको रंगेली नगरपालिका–५ धनपट्टीमा मंगलबार बिहान एक युवकले श्रीमतीको हत्या गरी आफुले पनि आत्महत्या गरेका छन्। वैवाहिक सम्बन्ध र घरेलु तनावको बीचमा जन्मिएको यो हिंसाले एकै परिवारका दुई जनाको जिवन समाप्त भएको छ।

२१ वर्षीय युवकले आफ्नै श्रीमतीमाथि चक्कु प्रहार गरी हत्या गरेपछि सोही हतियारले घाँटी रेटेर आत्महत्या गरेको प्रहरीले जनाएको छ। प्रहरीका अनुसार रंगेली–५ बहुवनका मुकेशकुमार मण्डल सोमबार बेलुका ससुराली घर पुगेका थिए। सामान्य भेटघाटका लागि आएको भनिएका उनी र उनकी पत्नी अम्बिकाकुमारी मण्डलबीच राति विवाद भएको थियो।

मंगलबार बिहान करिब २ः४५ बजे विवाद हिंसात्मक बनेपछि मुकेशले अम्बिकामाथि चक्कु प्रहार गरेका थिए। घटनास्थलमै रगताम्य अवस्थामा ढलेकी अम्बिकाको तत्काल मृत्यु भएको मोरङ प्रहरीका डीएसपी लीलाराज लामिछानेले बताए।

पत्नीको ज्यान गएपछि मुकेशले पनि त्यही चक्कुले आफ्नै घाँटीमा प्रहार गरेका थिए। अत्यधिक रक्तस्रावका कारण उनको पनि घटनास्थलमै मृत्यु भएको प्रहरीले जनाएको छ। घटना ससुराली घरभित्रै भएको र परिवारका सदस्यहरू स्तब्ध अवस्थामा रहेको प्रहरीले जनाएको छ।

बिहानपख मात्रै घटना सार्वजनिक भएपछि स्थानीय बासिन्दा र आफन्त घटनास्थलमा भेला भएका थिए। एकैचोटि दुई शव देखिएपछि गाउँ नै शोकमग्न बनेको थियो। प्रहरीले घटनास्थल पुगेर मुचुल्का उठाउने, प्रमाण संकलन गर्ने तथा कानुनी प्रक्रिया अघि बढाउने काम गरिरहेको छ।

मोरङ प्रहरी प्रमुख एसपी कवित कटवालसमेत घटनास्थल पुगेर अनुसन्धानको नेतृत्व गरिरहेका छन्। घरेलु विवाद नै घटनाको मुख्य कारण हुन सक्ने आशंका गरिएको भए पनि वास्तविक कारण, पारिवारिक पृष्ठभूमि र विवादको स्वरूपबारे विस्तृत अनुसन्धानपछि मात्रै स्पष्ट हुने डीएसपी लामिछानेले बताए।

स्थानीयका अनुसार दुवै जना कम उमेरमै विवाह बन्धनमा बाँधिएका थिए। तर सम्बन्धभित्र बढ्दै गएको तनाव अन्ततः ज्यानै लिने हिंसामा परिणत भएको देखिन्छ। यो घटनाले पारिवारिक कलह र मानसिक तनाव समयमै समाधान नगर्दा कति भयावह परिणति निम्तिन सक्छ भन्ने कठोर चित्र उजागर भएको छ।