दिक्तेल– खोटाङमा रक्सीले मातेका एक व्यक्तिले लखेटी–लखेटी चिर्पटले हानेर श्रीमतीको हत्या गरेका छन्। श्रीमती ३६ वर्षीया लाक्पा डिकु शेर्पाको हत्या गरेको आरोपमा प्रहरीले दिक्तेल रुपाकोट मझुवागढी नगरपालिका–२ मुडेस्थित लालीखर्कका ४० वर्षीय दावा शेर्पालाई पक्राउ गरेको छ।

दावाले विहिवार रक्सी खाएर श्रीमतीसँग विवाद गरेका थिए। उनले यसअघि पनि विवाद गर्ने र कुटपिट गर्ने गरेका कारण लाक्पा डिकु भागेर मुलघर पुगेकी थिईन। तर, दावा पनि श्रीमतीको पछिपछि मुलघरमै पुगेर रातको समयमा चिर्पटले हानेको स्थानीयले बताएका छन्।

लाक्पा डिकुको शव घरदेखि करिब दुई सय मिटर टाढा गोरेटो बाटोमा फेला परेको उनीहरुले बताए। उनको हत्या गरेको आरोपमा दावालाई गएराति नै प्रहरीले पक्राउ गरेको छ। डिकुको शव परिक्षणका लागि जिल्ला अस्पताल लगिएको छ।

जिल्ला प्रहरी कार्यालयका इन्स्पेक्टर बेनु कार्कीका अनुसार शेर्पा दम्पतीबीच यसअघिदेखि नै सामान्य विवाद हुने गरेको थियो। उनीहरुका दुई छोरी छन्।