राजावादीलाई प्रचण्डको प्रश्नः ‘नारायणहिटी हत्याकाण्ड’ कसले मच्चायो?
![राजावादीलाई प्रचण्डको प्रश्नः ‘नारायणहिटी हत्याकाण्ड’ कसले मच्चायो?](https://www.sheershakhabar.com/wp-content/uploads/2023/11/prachanda.jpg)
काठमाडौं– प्रधानमन्त्री पुष्पकमल दाहालले दमौली पुगेर राजदरबार हत्याकाण्डका विषयमा राजावादीहरुलाई प्रश्न गरेका छन्। शुक्रवार तनहुँको आँबुखैरेनी अस्पतालको उदघाटन गर्दै उनले नारायणहिटी हत्याकाण्ड कस्ले मच्चायो ? भन्दै प्रश्न गरे।
हिजोका सामन्ती तत्वहरूले देशमा अराजकता निम्त्याउने र राजनीतिक प्रणाली असफल पार्ने सपना देखेको दाबी गर्दै उनले भ्रामक प्रचार र व्यवस्थाविरोधी षड्यन्त्र असफल पार्नुपर्ने र जनता न्यायाधीश भएकाले उनीहरूले असफल पार्ने बताए।
‘उनीहरू सङ्घीयताका विरुद्ध, गणतन्त्रका विरुद्ध, समावेशी–समानुपातिक प्रणालीका विरुद्ध जनतामा अफवाह फैलाउन खोजिरहेका छन्’ उनले भने–‘लोकतन्त्रको अर्थ अराजकता होइन, स्वतन्त्रता हो, सुव्यवस्था र जिम्मेवारीबोध हो।’
गणतन्त्रअघि सुव्यवस्था, विकास र प्रगति थियो ? भन्दै उनले अहिले संस्कारको कुरा गरिरहेका शक्तिको संस्कार के हो? भन्दै प्रश्न गरे। ‘कोतपर्व, भण्डारखाल पर्व, नारायणहिटी हत्याकाण्ड कसले मच्चायो ? हजारौँ नेपालीमाथि दमन कसले गर्यो?’ उनले भने–‘जो सबैभन्दा बढी तानाशाह छन्, फासिस्ट छन्, विकासविरोधी छन्, उनीहरूले नै स्वतन्त्रताको कुरा गर्ने ? संस्कारको कुरा गर्ने?’
संविधानलाई संस्थागत गर्ने प्रक्रिया चलिरहेको बताउँदै उनले सङ्घीयता जनताको हितमा छ भन्ने प्रमाणित गरिने दाबी पनि गरे। प्रदेश सरकार बलियो बनाउन प्रहरी समायोजन ऐन, निजामती ऐन र शिक्षा ऐन आवश्यक भएको बताउँदै उनले यी ऐन भए मात्रै प्रदेश सरकार बलियो हुने जिकिर गरे।