काठमाडौं– आजदेखि विहानदेखि लागू हुने गरी पेट्रोलियम पदार्थको मूल्य फेरी वढेको छ। नेपाल आयल निगमले मङ्गलबार बिहानदेखि कायम हुने गरी पेट्रोल, डिजेल र मट्टितेलमा मूल्य वृद्धि गरेको हो।

नेपाल आयल निगम लिमिटेडले जारी गरेको प्रेस विज्ञप्ति अनुसार इण्डियन आयल कर्पोरेसनबाट प्राप्त नयाँ खरिद मूल्य अनुसार पेट्रोलियम पदार्थको मूल्य बढाइएको हो। भारतबाट पेट्रोल प्रतिलिटर २.९६ रुपैयाँ र डिजेल प्रतिलिटर ३.४६ रुपैयाँले मुल्य बढेर आएको निगमले जनाएको छ।

मूल्य वृद्धिसँगै पहिलो वर्ग अन्तर्गत चारआली, विराटनगर, जनकपुर, अमलेखगञ्ज, भलवारी, नेपालगन्ज, धनगढी र वीरगन्ज क्षेत्रमा एक लिटर पेट्रोलको मूल्य १७२ रुपैयाँ ५० पैसाबाट १७५ रुपैयाँ ५० पैसा तोकिएको छ।

दोस्रो वर्ग अन्तर्गत सुर्खेत र दाङ क्षेत्रमा एक लिटर पेट्रोलको मूल्य १७४ रुपैयाँ ५० पैसाबाट १७७ रुपैयाँ कायम भएको छ। यस्तै तेस्रो वर्ग अन्तर्गत काठमाडौं, पोखरा र दिपायल क्षेत्रमा एक लिटर पेट्रोलको मूल्य १७५ रुपैयाँबाट १७८ रुपैयाँ पुगेको छ।

यसैगरी डिजेल र मट्टितेल एक लिटरको मूल्य क्रमशः १५८, १६० र १६१ रुपैयाँ प्रतिलिटर कायम भएको छ।