घर जाने बेलामा एआईजी ज्ञवालीमाथि आपत, कारवाहीमा पर्ने निश्चित

काठमाण्डौं– नेपाल प्रहरीमा समानान्तर हेडक्वार्टर चलाएको र आइजिपी वसन्त कुँवरलाई ‘कू’ गरेर आफू आइजिपी बन्ने चलखेल गरेको आरोप लागेका एआइजी श्याम ज्ञवाली कारवाहीमा पर्ने लगभग निश्चित जस्दै बनेको छ।
उमेर हदका कारण भदौमा अवकासमा जाने बेला उनी कारवाही खाएर कालो मुख लगाएर घर जाने भएका छन्। स्रोतका अनुसार उनले विभिन्न अपराधका आरोपित र कसुरदारसँग करोडौँ लेनदेन गरेको र ब्यक्तिगत फाईदका लागि पदको चरण दुरुपयोग गरेका प्रमाणहरु फेला परेका छन्।
एआइजी टेकप्रसाद राई नेतृत्वमा गठित छानबिन समितिमा पीडितहरूबाट ज्ञवाली विरुद्ध प्रमाणहरू पेश भएकाले सोही प्रमाण र छानबिन समितिको सिफारिसका आधारमा उनीमाथि सरकारले कारबाही गर्ने जनाईएको छ।
गृहमन्त्री रमेश लेखकले सोही कारण सीआईबीका तत्कालीन प्रमुख ज्ञवालीलाई हटाउन मंगलवारको मन्त्रिपरिषद् बैठकमा प्रस्ताव लगेका थिए। उनले ज्ञवालीलाई हटाउँने ठाडो प्रश्ताव मात्रै लगेनन्, उनका बदमासीका विवरण समेत वैठकमा जानकारी गराएको स्रोतको दावी छ। उनलाई सीआईबी राखिरहँदा प्रमाणहरू नष्ट गर्ने देखिएको जनाउने उनले सरुवा प्रस्ताव लगेका थिए।
बैठकमा मन्त्री लेखकले छानबिनमा परेको व्यक्तिलाई सीआईबीजस्तो महत्वपूर्ण ठाउँमा राख्दा प्रमाण नष्ट गर्ने र पदको थप दुरुपयोग गर्ने जोखिम देखिएकाले सरुवा गर्ने प्रस्ताव राखेका थिए । सोही बैठकले सीआईबीमा दीपक थापालाई लगेर ज्ञवालीलाई प्रदेश समन्वय विभागमा सरुवा गरेको छ।
ज्ञवालीले अघिल्लो सरकारका गृहमन्त्री रवि लामिछानेका पालामा समानान्तर हेडक्वार्टर चलाएको र आइजिपी वसन्त कुँवरलाई ‘कू’ गरेर आफू आइजिपी बन्ने प्रयास गरेको आरोप छ। तर, तत्कालीन सत्ता गठबन्धनका नेता केपी शर्मा ओलीको अस्विकृतिका कारण प्रहरीमा ज्ञवालीको ‘कू’को प्रयास असफल भएको थियो।
ज्ञवालीले सीआइबीको छवि नै समाप्त हुने गरी पदको चरम दुरुपयोग गरेको आरोप छ। उनीमाथि सहकारी ठगी प्रकरणका फाइल नै गायब पारेको, सुन तस्करी छानबिन रोकेर आरोपीलाई जोगाएको तथा जीवन चलाउनेलगायत कतिपयसँग करोडौँ रकम बार्गेनिङ गरेर पैसा नदिए सुन तस्करीमा फसाइदिने धम्की दिएको प्रमाण नै सार्वजनिक भएका छन्।
ज्ञवालीमाथि बालमन्दिर जग्गा हिनामिना प्रकरणका आरोपीसँग साँठगाँठ गरेको तथा बैंकिङ कसुरमा पक्राउ परेका व्यक्तिहरूसँग करोडौँ रुपैयाँसम्म लेनदेन गरेको पाइएको छ। ज्ञवालीले महानगरीय प्रहरी आयुक्त भएका बेला नक्कली भुटानी शरणार्थी प्रकरणमा पक्राउ परेका इन्द्रजीत राईलाई मध्यरातमा परिसरको हिरासतबाट रानीपोखरीमा लगी अख्तियार प्रमुख प्रेम राईलगायतको नाम पोल्न दबाब दिएका थिए।
अख्तियारले उनको उमेर किर्ते गरेर नागरिकता बनाएको प्रकरणमा अनुसन्धान थालेपछि उनले नक्कली शरणार्थी प्रकरणमा अख्तियार प्रमुखको नाम पोल्न लगाउन अभियुक्तहरूलाई राति राति रानीपोखरीमा ल्याएर यातना दिएको त्यति बेलै खुलेको थियो।
पछिल्लो समय नक्कली भुटानी शरणार्थी प्रकरणमा बेचन झा पक्राउ परेपछि उनलाई समेत यातना हिरासतमा दिएर आईजीपी कुँवरको नाम पोल्न दवाव दिएको सूचनाहरु वाहिरिएका छन्। तर, झाले ज्ञवालीको दबावलाई अस्विकार गरेको स्रोतको दावी छ।