काठमाण्डौं– बुधबार दिउँसो नुवाकोटको शिवपुरी गाउँपालिका–७, सुर्यचौरको डाँडामा भएको एयर डाइनेस्टीको हेलिकप्टर दुर्घटनामा ज्यान गुमाएका क्याप्टेन अरूण मल्ल जनयुद्धताका माओवादीको अपहरणमा समेत परेको खुलेको छ।

उनी यसअघि १० असोज ०७० मा सोलुखुम्बुको लुक्ला विमानस्थलमा पनि हेलिकप्टर दुर्घटनामा परेका थिए। त्यसवेला उनलाई सामान्य चोटपटक मात्र लागेको थियो। ३५ वर्ष भन्दा बढी हेलिकप्टर उडाएको अनुभव भएका क्याप्टेन मल्ल वरिष्ठ र सहासी क्याप्टेनमा गनिन्छन्। उनी एकदमै अनुभवी रहेको अन्य हेलिकप्टर चालकहरु बताउँछन्। उनका श्रीमती र दुई छोरी छन्।

यता, हेलिकोप्टर दुर्घटनामा ज्यान गुमाएका चिनियाँ पर्यटकहरू तीन दिनअघि मात्रै नेपाल आएको पाइएको छ। २१ साउनमा उनीहरू स्थलमार्ग हुँदै नेपाल प्रवेश गरेका थिए। चारै जना चिनियाँ पर्यटक रसुवाको केरुङ नाका हुँदै नेपाल प्रवेश गरेको खुलेको छ।

बुधबार दिउँसो उनीहरू एयर डाइनेस्टीको हेलिकोप्टरबाट काठमाडौंबाट रसुवाको स्याफ्रुबेसी उडेका थिए। उडेको तीन मिनेटमै हेलिकोप्टर नुवाकोटको सूर्यचौरमा दुर्घटना भएको थियो। दुर्घटनामा चिनियाँ पर्यटक ३८ वर्षीय जुताओ ताङ, ३६ वर्षीय जी ली, ४१ वर्षीय जेमिङ सी र ३१ वर्षीया महिला वु यीयाओले ज्यान गुमाएका हुन्। मृतकमध्ये तीन पुरुष सिचुवान प्रान्तका हुन् भने महिला ग्वान्झाउकी हुन्।

हेलिकप्टर खराब मौसमका कारण दुर्घटना भएको आशंका गरिएको छ। दुर्घटनास्थलको भौगोलिक अवस्था हेर्दा खराब मौसमका कारण दुर्घटना भएको जस्तो देखिएको शिवपुरी गाउँपालिकाका अध्यक्ष गोविन्द थपलियाले बताए।

दुर्घटनाग्रस्त क्षेत्रमा बिहानैदेखि बाक्लो कुहिरो लागेको दुर्घटनास्थल बरु खोँचजस्तो ठाउँ रहेको उनले बताए। उनका अनुसार विमान गुर्जे भन्ज्याङबाट सूर्यचौर नपुग्दैको जंगलमा दुर्घटनाग्रस्त भएको छ। दुर्घटनामा सबार सबै ५ जनाको शव फेला परेको उनले जानकारी दिए।

नागरिक उड्डयन प्राधिकरणले बुधबार एक विज्ञप्ति जारी गर्दै काठमाडौँ विमानस्थलबाट दिउँसो १ः५४ मा उक्त हेलिकप्टर उडेको जानकारी दिएको छ।