जनकपुर– १० दिनअघि धनुषाको महेन्द्रनगरस्थित नेपाल आयल निगमको डिपोमा विवाद हुँदा वेल्चाले हानेर सहकर्मीको हत्या गरेका कर्मचारी प्रकाश यादव लामो समय सुधार गृहमा वसेर निस्किएको खुलेको छ।

धनुषाको धनुषाधाम नगरपालिका–४ का ३५ वर्षीय प्रकाश सुधार गृहबाट निस्कने वित्तिकै डिपोमा करारको जागिरे भएको एक कर्मचारीले नै वताएका छन्। १४ भदौको करिव १० बजे उनले बेल्चाले हानेर सिरहाको सिरहा नगरपालिका–३, मखनाहा घर भई डिपोमा कार्यरत करारकै कर्मचारी ४० वर्षीय राकेश बर्माको हत्या गरेका थिए।

डिपोका अन्य कर्मचारीहरुका अनुसार प्रकाशको स्वभाव झन्काहा र सन्की पाराको थियो। सानोतिनो कुरामा पनि झोक्किने, रिसाउने र सन्किएर हिड्ने बानी थियो। कर्मचारी हरि यादवका अनुसार प्रकाश पहिला लामो समय सुधारगृहमा बसेर निस्किएका हुन। सुधारगृहबाट आएको केही समयपछि नै उनी डिपोमा करार कर्मचारीको रूपमा भर्ना भएका थिए।

अर्का कर्मचारी सुरेश महतोका अनुसार राकेशको शव चेन्जिङ रुममा रगताम्मे अवस्थामा र शव नजिकै उनलाई प्रहार गरिएको बेल्चा रगत लागेकै अवस्थामा फेला परेको थियो। घाँटी र टाउकोमा चोट थियो। दाँत खुस्किएका थिए भने आँखा बाहिर निस्किएको थियो।

प्रकाश राकेश डिपोमा करिव ४ वर्षदेखि कार्यरत थिए। प्रकाशको काम ट्यांकरमा आउने आयलमा पानी छ÷छैन भनेर जाँच्ने र राकेशको काम ट्यांकरको सिल जाँच्ने थियो। कर्मचारी मुकेश यादवका अनुसार राकेश र प्रकाश मिल्ने साथी हुन। उनीहरुको वसाई पनि कार्यालयमा एउटै कोठामा हुन्थ्यो। तर, त्यस दिन के कुरामा विवाद भयो र राकेशको हत्या भयो भन्ने कसैले पत्ता लगाउन सकेका छैनन्।

प्रकाशले भने ‘आमाचकारी गाली’ गरेपछि बेल्चाले हानेको बताएका थिए। उनले यसो भनिरहँदा उनको अनुहारमा आत्मग्लानी, दुःख, पीर, चिन्ता र डर केही नदेखिएको डिपो प्रमुख मनोज साह वताउँछन्। कर्मचारीहरुले खवर गर्ने वित्तिकै आफु डिपोमा पुगेको र प्रहरी नपुगेसम्म गार्डलाई लगाएर प्रकाशलाई एउटा कोठामा थुनेर राखेको उनले बताए।

इलाका प्रहरी कार्यालय सखुवा महेन्द्रनगरका इन्स्पेक्टर सोनुकुमार साहले अहिलेसम्म हत्याको कारण खुलिनसकेको बताएका छन्। घट्नाको विषयमा नयाँ कुरा केही नभएको उनले जानकारी दिए।

मृतक राकेशका डेढ वर्षको छोरा र पाँच वर्षकी छोरी छन्।