विराटनगर– मोरङको सुन्दरहरैँचामा विहिबार बस र टिपरको ठक्करबाट मृत्यु भएकी स्कुटर चालक महिलाको पहिचान खुलेको छ। सन्दरहरैँचा नगरपालिका–१० किस्ती पुलमा भएको दुर्घटनामा परी सुनसरीको धरान उपमहानगरपालिका–१५ की भीमा राई (४३) को मृत्यु भएको हो।

प्रहरीका अनुसार टिपरलाई ‘ओभरटेक’ गरेर पश्चिमतर्फ जाँदै गरेकी भीमा सवार को २८ प ६१३२ नम्बरको स्कुटर विपरीत दिशामा जाँदै गरेको मे १ ख २७९१ नम्बरको बसमा ठोक्किएको थियो। बसमा ठोक्किएर अनियन्त्रित भएको स्कुटर सडकमा लडेको र आफैंले ओभरटेक गरेको बालुवा बोकेको को १ क ३४१७ नम्बरको टिपरले किचेर उनी घाईते भएको प्रहरीले जनाएको छ।

घाईते भीमालाई उपचारका लागि विराटनगरको कोशी अस्पताल पु¥याएपनि चिकित्सकले मृत घोषित गरेका थिए। मृतकको तत्काल पहिचान खुलेको थिएन। उनी धनकुटाको खोकु घर भइ धरान– १५ बस्दै आएको जिल्ला प्रहरी कार्यालय मोरङका डीएसपी वेदप्रकाश जोशीले जानकारी दिए।

यसअघि प्रहरीले विपरीत दिशाबाट आउँदै गरेको स्कुटरलाई टिपरले ठक्कर दिँदा दुर्घटना भएको जनाएको थियो। तर, घटनास्थलको सीसी क्यामराको फुटेज हेर्दा दुर्घटनामा बस पनि संलग्न रहेको देखिएको हो।

प्रहरीले टिपर चालक सुनसरीको इटहरी उपमहानगरपालिका–१९ का श्यामबाबु चौधरी (२९) र बस चालक झापाको मेचीनगर नगरपालिका–७ का नेत्र दर्जी (४०) लाई पक्राउ गरेको छ।