मोदीका पूर्वसुरक्षा गार्डको भविष्यवाणीः केपी ओली सरकार एक महिनामा ढल्छ
शीर्ष खबर 
काठमाडौँ– भारतीय गुप्तचर संस्था रअ (रिसर्च एन्ड एनालिसिस विङ) का पूर्वएजेन्ट लक्ष्मण सिंह विष्ट (लक्की विष्ट)ले केपी शर्मा ओली नेतृत्वको सरकार एक महिनाभित्र ढल्ने दाबी गरेका छन्। भारतीय प्रधानमन्त्रीका पूर्वनिजी सुरक्षा अधिकारी समेत रहेका विष्टले भारतीय मिडिया नवभारत टाइम्सलाई अन्तरवार्त दिँदै यस्तो दावी गरेका हुन।
नेपालमा सरकार ढल्न लागेको ठोकुवा गरेका उनले त्यसको सूचना आफूसँग रहेको जिकिर गरेका छन्। ‘आज डिसेम्बर १२ तारिख हो, हाम्रो लागि महत्वपूर्ण विषय भनेको गुप्त सूचना हुन्छ’, अन्तर्वार्तामा उनले भनेका छन्,–‘तपाईंलाई आश्चर्य लाग्न सक्छ, तर म एउटा खुलासा गर्दिन्छु कि नेपालको सरकार ढल्नेवाला छ।’
उनले आफ्नो दावीलाई नोट गरेर राख्न पटक –पटक आग्रहसमेत गरेका छन्। विष्टले भनेका छन्–‘१५ दिनदेखि एक महिनाभित्र नेपालको सरकार ढलेको समाचार पढ्न पाउनुहुनेछ, जुन सरकार तीन÷चार महिनाअघि मात्र बनेको थियो। त्यतिबेला तपाईंलाई लक्की बिष्टले भनेको कुरा याद आउनेछ। यो कुरा नोट गरेर राख्नुभए हुन्छ।’
उनले सरकार ढल्ने ठोस आधार भने दिन सकेका छैनन्। ‘रअ’मा कार्यरत रहँदा थुप्रै देशमा आफूले काम गरेको बताएका उनले नेपालमा पनि सो क्रममा थुप्रै मिसन सफल गरेको बताएका छन्। तर, काम गर्न नेपाल जति गाह्रो अरू देशमा नभएको उनको भनाइ छ।
नेपाल खतरनाक लाग्ने भन्दै उनले अन्तर्वार्ताका क्रममा नेपाल विश्वभरका गुप्चतर एजेन्सीको खेल्ने ठाउँ भएको पनि दाबी गरेका छन्। यसअघिका कतिपय अन्तरवार्ताहरुमा उनले नेपालमा नक्कली भारतीय नोट कारोबार बन्द गराउन तथा ठुलो गिरोहलाई समात्न समेत आफूले काम गरेको बताएका थिए।
यता, नेपालका प्रधानमन्त्री ओलीले भने भारत भ्रमणको तयारी भइरहेको बताउँदै आएका छन्। केही दिनअघि झापाको एक कार्यक्रममा उनले ‘मान्छेहरुले पत्याएका छैनन् होला, तर म भारत पनि जान्छु, तयारी भइरहेको छ।’ भन्दै वताएका थिए।
तर, ‘रअ’का पूर्वअधिकारीले मिति नै तोकेर सरकार ढल्ने दावी गरेपछि यतिबेला राजनीतिक बृत्तमा अनेकौँ आशंका सिर्जना भएको छ। यसअघि प्रधानमन्त्री केपी शर्मा ओली चीन भ्रमणबाट फर्किए लगत्तै सरकार ढल्न सक्ने चर्चा चलेको थियो। नेपालको सरकार बनाउने र ढाल्ने खेलमा भारतको प्रत्यक्ष संलग्नता रहने भाष्य बनिरहेकाले पनि विष्टको अन्तरवार्तालाई महत्वका साथ हेरिएको छ।
