इटहरी– सुनसरीको धरान उपमहानगरपालिका–१३ स्थित कोशी लोकमार्गबाट सशस्त्र प्रहरीले सोमबार ठूलो परिमाणमा गाँजासहित एक ट्रक नियन्त्रणमा लिएको छ।

प्रहरीले नियन्त्रणमा लिएको ट्रकबाट करिब २ हजार १ सय ३० किलोग्राम (२,१३० किलो) गाँजा बरामद भएको जनाएको छ।

सशस्त्र प्रहरी बल नेपाल, धरान सुरक्षा बेसको टोलीले विशेष सूचनाका आधारमा भेडेटारबाट धरानतर्फ आउँदै गरेको प्रदेश १–०२–००२ ख ०८४८ नम्बरको ट्रक जाँच गरेको थियो। त्यस क्रममा ट्रकभित्र लुकाइछिपाइ ल्याइँदै गरेको गाँजा फेला पारेको प्रहरीले जनाएको छ।

उक्त ट्रकमा ७० बोरा गाँजा र ३१ बोरा अदुवा तथा अन्य तरकारी राखिएको पाइएको छ। गाँजा ओसारपसारमा संलग्न व्यक्ति र ट्रक चालक भने प्रहरीलाई देखेपछि फरार भएका छन्। हाल उनीहरुको खोजी कार्य जारी रहेको सशस्त्र प्रहरीले जानकारी दिएको छ।

सशस्त्र प्रहरीले बरामद गाँजा, ट्रक र अन्य सामग्रीलाई आवश्यक कारबाहीका लागि सम्बन्धित निकायमा बुझाउने प्रक्रिया अघि बढाएको बताएको छ।