उदयपुरमा मेयरको ढुङ्गा गिटी तस्करी विरुद्ध बोल्ने वडाध्यक्षको सेवा सुविधा रोकियो, अदालत जाने तयारी
शीर्ष खबर 
गाईघाट — उदयपुरको चौदण्डीगढी नगरपालिका–७ का वडाध्यक्ष केशव अधिकारी पछिल्ला दिनमा आफ्नै नगरपालिकासँग संघर्षरत छन्। अवैध उत्खननविरुद्ध उभिएका अधिकारी अहिले व्यक्तिगत र राजनीतिक दबाबको चपेटामा परेका छन्।
नगरभित्र लामाखोला र माडीबास खोलामा ढुंगा, गिट्टी, बालुवा र माटोको अवैध उत्खनन भइरहेको विषयमा केही समय अघि उनले आवाज उठाए। अधिकारीले नगरप्रमुख कालुमान लामाले आफन्त र सेटिङमार्फत अवैध उत्खनन गरी राजस्व छली गरेको भन्दै अख्तियार दुरुपयोग अनुसन्धान आयोगमा उजुरीसमेत दिएका छन्। यसअघि उनले जिल्ला प्रशासन कार्यालयमा उत्खनन रोक्न ज्ञापन पत्र बुझाएका थिए।
तर, यस संघर्षपछि अधिकारीमाथि प्रतिशोध सुरु भएको देखिएको छ। चौदण्डीगढी नगरपालिकाको २१ वैशाखमा बसेको १२औं कार्यपालिका बैठकले उनको मासिक सेवा सुविधा अर्को व्यवस्था नभएसम्मका लागि रोक्का गर्ने निर्णय गरेको छ। नगरपालिका बैठकले अधिकारीमाथि ‘पदीय जिम्मेवारी निर्वाहा नगरी विगत वर्षहरुदेखिनै नगरपालिकासँग प्रचिलित कानुनको पालना नगर्ने, वडाभित्र रहेर पनि विना कारण वडा सदस्यहरुलाई कार्यवाहकको जिम्मेवारी दिने, सो को जानकारी नगरपालिकालाई नदिने, नगरपालिकाकाले निमन्त्रणा गरेको कार्यपालिका बैठकमा, नगरसभा बैठक तथा अन्य कुनै पनि बैठकमा सहभागी नहुने’ गरेको आरोप लगाएको छ।
अधिकारी भने न्यायका लागि अदालत जाने तयारीमा छन्। ‘मैले अवैध कामको विरोध गर्दा मलाई सेवा सुविधा नै रोक्ने निर्णय गरिएको रहेछ,’ उनले भने, ‘मैले वैशाखदेखि तलब पाएको थिइनँ, पछि कारण थाहा पाउँदा कार्यपालिकाको बैठकबाट यस्तो निर्णय गरिएको रहेछ। अब म अदालतबाट न्याय खोज्छु।’
अधिकारीले सोमबार बस्ने कार्यपालिकाको बैठकमा उपस्थित भई आफ्ना कुरा राख्ने तयारी गरेको जनाए। ‘मलाई बोलाइएको छैन, तर म बैठकमा जान्छु,’ उनले भने, ‘वडाका सबै काम म आफैं गर्दै आएको छु। म आफ्नो कर्तव्यबाट पछि हट्दिन।’
नगरभित्रकै अवैध उत्खननविरुद्ध अधिकारीको संघर्षमा स्थानीय बासिन्दाले पनि समर्थन जनाइरहेका छन्। तर, सत्तारूढ नेकपा एमालेबाटै निर्वाचित अधिकारी अहिले आफ्नै पार्टी नेतृत्वसँग जुधिरहेका छन्। मेयर कालुमान लामा पनि एमालेबाटै निर्वाचित भएका हुन। उनको मुद्दाले चौदण्डीगढी नगरपालिकामा आन्तरिक द्वन्द्व चुलिएको संकेत देखिएको छ।
चौदण्डीगढी नगरपालिकाको २ र ४ मा पर्ने लामाखोला र माडीबास खोलामा अवैध रुपमा नगरप्रमुखकै सेटिङमा ढुंगा, गिट्टी, बालुवा र माटोको उत्खन्न भएको भन्दै वडा अध्यक्ष अधिकारीले विरोध गरेका थिए।
यो पनि,
