काठमाडौँ– राष्ट्रिय स्वतन्त्र पार्टी (रास्वपा) की सांसद तथा सचेतक क्रान्तिशिखा धितालले सञ्चारमाध्यमको प्रश्न सोध्ने शैलीमाथि कडा प्रश्न उठाएकी छिन्। महिला नेतृहरूसँग अन्तर्वार्ता लिँदा उनीहरूको विचार, नीति र राजनीतिक धारणा भन्दा बाह्य रूप र सौन्दर्यलाई प्राथमिकतामा राख्ने प्रवृत्तिले पत्रकारिताको स्तर नै खस्काएको उनको स्पष्ट टिप्पणी छ।

पत्रकारिता पृष्ठभूमिबाट राजनीतिमा आएकी धितालले सामाजिक सञ्जालमार्फत सार्वजनिक रूपमा असन्तुष्टि जनाउँदै यस्तो अभ्यासले महिलालाई गम्भीर बहसबाट योजनाबद्ध रूपमा पन्छाउने काम गरिरहेको आरोप लगाएकी हुन्।

उनका अनुसार विशेषगरी युवा महिला नेताहरूसँग संवाद सुरु गर्दा ‘राम्री देखिनुहुन्छ’, ‘चिटिक्क भएर आउनुभएको छ’ जस्ता टिप्पणीलाई प्राथमिकता दिने शैली सामान्य देखिए पनि यसको प्रभाव गम्भीर र दीर्घकालीन छ। यस्तो भाषिक प्रयोगले महिलालाई नीति–निर्माणको केन्द्रबाट हटाएर केवल दृश्य उपस्थितिमा सीमित गर्ने संरचनागत समस्या बोकेको उनको तर्क छ।

धितालले यसलाई व्यक्तिगत प्रशंसाको रूपमा सामान्यीकरण गर्न नहुने भन्दै यसले सार्वजनिक बहसको गुणस्तर नै कमजोर बनाउने उल्लेख गरेकी छिन्। उनले मिडियाले उठाउनुपर्ने प्रश्नहरू अझ गहिरा, तथ्यपरक र बौद्धिक हुनुपर्नेमा जोड दिएकी छन्। पछिल्लो समय मूलधारका सञ्चारमाध्यम र युट्युब प्लेटफर्मबीच देखिएको प्रतिस्पर्धा पनि प्रश्नको स्तरमै निर्भर रहने उनको धारणा छ।

उनका शब्दमा, गम्भीर बहसलाई अघि बढाउने जिम्मेवारी मिडियाकै काँधमा छ। र त्यसबाट विचलित हुँदा लोकतान्त्रिक संवाद कमजोर बन्छ। उनले मिडियालाई आफ्नो प्रश्न गर्ने स्तर उकास्न आग्रह गर्दै आवश्यकता परे वैकल्पिक प्लेटफर्मबाट समेत सिक्न संकोच नगर्न सुझाएकी छिन्।

धितालले महिला नेतृहरूलाई समेत आत्ममूल्यांकन गर्न आह्वान गरेकी छिन्। बाह्य रूपको प्रशंसामा मात्र अल्झिनु भन्दा आफ्नो राजनीतिक भूमिका, विचार र जिम्मेवारीप्रति सचेत हुनुपर्ने उनको भनाइ छ। सामाजिक सञ्जालमा महिलाको हिँडाइ, हाँसो वा प्रस्तुति केन्द्रित सामग्रीले लोकप्रियता पाउन थालेको प्रवृत्तिप्रति चिन्ता व्यक्त गर्दै उनले यस्तो संस्कृतिले समानताको संघर्षलाई नै कमजोर बनाउने चेतावनी दिएकी छन्।

समग्रमा धितालको अभिव्यक्तिले नेपाली मिडिया क्षेत्रमा विद्यमान लैङ्गिक दृष्टिकोण, प्रश्नको स्तर र सार्वजनिक बहसको गुणस्तरबारे गम्भीर बहसको ढोका खोलेको छ।