जुवा खेलेको आरोपमा वीरगञ्जको क्यासिनोमा प्रहरी इन्स्पेक्टर र गाउँपालिका अध्यक्ष नै पक्राउ, ४ कर्मचारी पनि हिरासतमा
शीर्ष खबर 
वीरगञ्ज– कानुन कार्यान्वयनको जिम्मेवारीमा रहेका नेपाल प्रहरीका एक इन्स्पेक्टर नै वीरगञ्जको क्यासिनोमा जुवा खेलेको आरोपमा पक्राउ परेका छन्। इलाका प्रहरी कार्यालय पोखरियाका प्रहरी इन्स्पेक्टर प्रदीप पौडेललाई शनिबार राति वीरगञ्ज महानगरपालिका–१४ गण्डकस्थित गोल्डेन फिंगर गेमिङ जोन प्रालिबाट गाउँपालिका अध्यक्षसहित पक्राउ गरिएको हो।
सोही कारबाहीमा नेपालीलाई क्यासिनो प्रवेश गराएर जुवा खेलाएको आरोपमा क्यासिनोका चार कर्मचारीसमेत नियन्त्रणमा परेका छन्। जिल्ला प्रहरी कार्यालय पर्साका अनुसार राति करिब साढे १० बजे क्यासिनोमा नेपाली नागरिकलाई प्रवेश गराई जुवा खेलाइरहेको अवस्थामा प्रहरीले आठ जनालाई नियन्त्रणमा लिएको थियो।
पक्राउ परेकामध्ये प्रहरी इन्स्पेक्टर पौडेल र सखुवाप्रसौनी गाउँपालिकाका अध्यक्ष ३६ वर्षीय जसवन्त यादवसहित चार जना क्यासिनोमा रहेका थिए भने नेपालीलाई प्रवेश गराउने आरोपमा क्यासिनोका चार कर्मचारी पक्राउ परेका हुन्।
प्रहरी इन्स्पेक्टर पौडेल इलाका प्रहरी कार्यालय पोखरियामा कार्यरत प्रहरी अधिकृत हुन्। प्रहरीको जिम्मेवारी नै कानुन कार्यान्वयन र गैरकानुनी गतिविधि नियन्त्रण गर्नु भए पनि उनी स्वयं क्यासिनोमा पक्राउ परेपछि घटनाले प्रहरी अधिकृतको संलग्नतामाथि प्रश्न उठाएको छ। प्रहरीले भने पौडेलमाथिको आरोप र उनको भूमिकाबारे अनुसन्धान भइरहेको जनाएको छ।
पक्राउ परेका क्यासिनो कर्मचारीमा वीरगञ्ज–१४ का २८ वर्षीय विजयकुमार पटेल, वीरगञ्ज–२५ का ३१ वर्षीय दिनेशकुमार पटेल, महोत्तरीको पिपरा गाउँपालिका–५ घर भई उक्त क्यासिनोमा कार्यरत ४९ वर्षीय जयदेव साह र वीरगञ्ज–१२ का ५० वर्षीय प्रदेशी साह छन्।
प्रहरीका अनुसार उनीहरूमाथि नेपाली नागरिकलाई क्यासिनोमा प्रवेश गराएर जुवा खेलाएको विषयमा अनुसन्धान भइरहेको छ। क्यासिनोका कर्मचारीको संलग्नता घटनाको अर्को महत्वपूर्ण पाटो बनेको छ, किनकि क्यासिनोमा नेपालीलाई प्रवेश गराउने कार्य नै प्रहरी कारबाहीको आधार बनेको छ।
पक्राउ पर्ने अन्यमा सखुवाप्रसौनी गाउँपालिका–६ का ३० वर्षीय चन्दन सहनी र वीरगञ्ज महानगरपालिका–११ का ३९ वर्षीय ओमप्रकाश बैठा छन्।
जिल्ला प्रहरी कार्यालय पर्साका प्रवक्ता डीएसपी चक्रबहादुर मल्लले नेपालीलाई क्यासिनोमा प्रवेश गराई जुवा खेलाइरहेको अवस्थामा उनीहरूलाई नियन्त्रणमा लिइएको बताएका छन्। डीएसपी राजु कार्कीका अनुसार पक्राउ परेका सबै हाल प्रहरी हिरासतमा छन् र घटनाबारे थप अनुसन्धान भइरहेको छ।
प्रहरी इन्स्पेक्टर पौडेलको घर स्याङ्जाको हरिनास गाउँपालिका–७ तथा गाउँपालिका अध्यक्ष यादवको घर सखुवाप्रसौनी गाउँपालिका–६ मा रहेको प्रहरीले जनाएको छ। घटनामा प्रहरी इन्स्पेक्टर जस्तो जिम्मेवार पदमा रहेका व्यक्ति र क्यासिनोका चार कर्मचारी एकै कारबाहीमा पक्राउ पर्नुले वीरगञ्जका क्यासिनोमा नेपाली नागरिकको प्रवेश तथा जुवासम्बन्धी गतिविधिको निगरानीमाथि पनि प्रश्न उठेको छ। प्रहरीले भने अनुसन्धानबाट खुलेका तथ्यका आधारमा थप कानुनी प्रक्रिया अघि बढाउने जनाएको छ।
