विराटनगर– तरकारी बोकेर भारततर्फ जाँदै गरेको पिकअप भ्यानबाट मोरङमा ५७० किलो गाँजा बरामद भएको छ। सशस्त्र प्रहरीले शनिबार राति जहदा गाउँपालिका–४ रामचोकबाट गाँजा बरामद गरेको हो। प्रहरीलाई देखेपछि चालक गाडी छाडेर फरार भएका छन्।

सशस्त्र प्रहरी बल नेपाल बोर्डर आउट पोस्ट (बीओपी) नोचाबाट खटिएको टोलीले भारततर्फ जाँदै गरेको प्रदेश १–०१–०० च ७४२२ नम्बरको पिकअप भ्यानलाई रोक्न खोजेको थियो। तर, चालकले गाडी रोकेर जाँचमा सहयोग गर्नुको सट्टा छाडेर भागेको सशस्त्र प्रहरीले जनाएको छ।

त्यसपछि भ्यानको खानतलासी गर्दा तरकारीभित्र लुकाएर राखिएको गाँजा फेला परेको हो। सशस्त्र प्रहरीका अनुसार स्कुस र बन्दाकोपीको बीचमा लुकाइएका १९ पोका गाँजा बरामद गरिएको थियो। तौल गर्दा गाँजाको कुल परिमाण ५७० किलो पुगेको छ।

सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीका अनुसार शनिबार राति करिब ११ बजे गाँजा बरामद भएको हो। तरकारी बोकेको गाडीमा गाँजा लुकाएर भारततर्फ लैजान खोजिएको प्रारम्भिक विवरण छ।

बरामद गाँजा र पिकअप भ्यानलाई आवश्यक अनुसन्धान तथा कानुनी कारबाहीका लागि नेपाल प्रहरीको जिम्मा लगाइएको छ। फरार चालकको खोजी भइरहेको प्रहरीले जनाएको छ।

गाँजा कसले कहाँबाट ल्याएको थियो, यसको गन्तव्य भारतको कुन स्थान थियो र तस्करीमा अन्य व्यक्ति संलग्न थिए वा थिएनन् भन्ने विषय अनुसन्धानपछि खुल्नेछ।