राजविराज– नेपाल–भारत सीमामा हुने तस्करी नियन्त्रणका लागि खटिएको सप्तरी प्रहरीको टोलीमाथि नै तस्कर समूहले आक्रमण गरेको घटना सार्वजनिक भएको छ। बलान बिहुल गाउँपालिका–५ रामनगर कोदरकट्टीस्थित नेपाल–भारत अन्तर्राष्ट्रिय सीमा क्षेत्र नजिक बुधबार बिहान भएको घटनामा रामनगर कोदरकट्टी प्रहरी चौकीका इन्चार्ज प्रहरी सहायक निरीक्षक (असई) रामकुमार यादवमाथि कुटपिट भएको छ।

प्रहरी स्रोतका अनुसार बिहान करिब ४ बजे सीमा स्तम्भ नम्बर २४३ नजिक कपडा तस्करी भइरहेको सूचनापछि प्रहरी टोली त्यस क्षेत्रमा पुगेको थियो। दशगजा आसपास तस्करी गतिविधि भइरहेको विशेष सूचनाका आधारमा प्रहरी परिचालन गरिएको बताइएको छ।

तर तस्करी नियन्त्रण गर्न पुगेको टोलीमाथि नै तस्कर समूह आइलागेको स्रोतको दाबी छ। घटनाका क्रममा असई यादवमाथि कुटपिट भएको तथा प्रहरीलाई अवरोध सिर्जना गरिएको जनाइएको छ। घटनाको अर्को संवेदनशील पक्ष भनेको आक्रमणमा भारतीय नागरिकसमेत संलग्न रहेको आशंका हो।

स्थानीय स्रोतहरूका अनुसार तस्कर समूहले भारतीय सीमाक्षेत्रबाट समेत व्यक्तिहरू बोलाएर प्रहरीमाथि आक्रमण गरेको आरोप लागेको छ। यद्यपि यसको आधिकारिक पुष्टि हुन बाँकी छ। घटनापछि केही समय सीमा क्षेत्रमा तनावपूर्ण अवस्था सिर्जना भएको थियो। प्रहरी र स्थानीयबीच चहलपहल बढेको तथा सीमाक्षेत्रमा सुरक्षा सतर्कता कडा पारिएको बताइएको छ।

जिल्ला प्रहरी कार्यालय सप्तरीका डीएसपी हेमराज घिमिरेले प्रहरीमाथि कुटपिट भएको पुष्टि गर्दै घटनाको वास्तविक कारण र संलग्न व्यक्तिहरूबारे अनुसन्धान भइरहेको जानकारी दिए। उनका अनुसार घटनामा संलग्न व्यक्तिहरूको पहिचान गर्ने तथा कानुनी दायरामा ल्याउने प्रक्रिया अघि बढाइएको छ। प्रहरीले घटनामा संलग्नहरूको खोजी तीव्र बनाएको जनाएको छ।

यसैबीच, घटनामा केही व्यक्तिको नाम अनुसन्धानको दायरामा आएको स्रोतले जनाएको छ। विशेषगरी लिलाधर दासको नाम शंकास्पद रूपमा आएको र त्यसबारे खोजतलास तथा तथ्य संकलन भइरहेको प्रहरी स्रोतले जनाएको छ। यद्यपि हालसम्म कसैविरुद्ध औपचारिक आरोप स्थापित भइसकेको छैन।

सप्तरीको दक्षिणी सीमा क्षेत्रमा पछिल्लो समय कपडा, किराना सामग्री तथा अन्य उपभोग्य वस्तुको अवैध ओसारपसार बढिरहेको गुनासो स्थानीय तहदेखि सुरक्षा निकायसम्म पुग्दै आएको छ। यस्ता गतिविधि नियन्त्रणका लागि समय–समयमा प्रहरी परिचालन हुने गरे पनि तस्कर समूहले प्रतिरोध गर्न थालेको यो घटना चिन्ताजनक रूपमा हेरिएको छ।

विशेषगरी सीमा क्षेत्रमा खटिएको प्रहरीमाथि नै आक्रमण हुनु सुरक्षा चुनौतीको संकेत मानिएको छ। यदि तस्कर समूहले खुला रूपमा प्रहरीमाथि हातपात गर्न सक्ने अवस्था विकसित भएको हो भने त्यसले सीमाक्षेत्रमा सक्रिय अवैध सञ्जालको पहुँच र प्रभावबारे थप प्रश्न उठाएको छ।

घटनाबारे थप अनुसन्धान जारी रहेको प्रहरीले जनाएको छ। संलग्न व्यक्तिहरूको पहिचान, भारतीय नागरिकको सम्भावित संलग्नता र तस्करी सञ्जालको संरचनाबारे विस्तृत अनुसन्धानपछि थप तथ्य सार्वजनिक हुने अपेक्षा गरिएको छ।