काठमाण्डौं– भारतको मेघालय स्थित पूर्वी जैन्तिया हिल्स (ईजेएच) मा ३ जना नेपालीसहित ४ जनाको घाँटी रेटेर हत्या गरिएको आज दोस्रो दिन पुरा भएको छ। तर, नेपालमा भने मृतकको पहिचाान खुल्न सकेको छैन।

शनिबार उम्प्लेङ बजार पछाडि ४ शव फेला परेका थिए। ती मध्ये एक जना इलाम घर भएका २३ वर्षीय रवि राई छन्। नयाँ दिल्लीस्थित नेपाली दूतावासका अनुसार राई आफ्नी दिदीसँग बस्दै आएका थिए। दिदी दूतावासको सम्पर्कमा रहेको जनाईएको छ।

अन्यको सनाखत भईसकेको छैन। तर, मृतक एकजना धरान र एकजना भोजपुर घर भएका व्यक्ति रहेको तथा एक जना भने स्थानीय आदिवासी रहेको जनाईएको छ। प्रहरी उपरीक्षक, ईजेएचका गिरी प्रसादले घटनाको पुष्टि गरेका छन्।

सुरक्षा अधिकारीहरुका अनुसार शवहरू हात बाँधिएको र घाँटीलगायत शरीरका विभिन्न भागमा धारिलो हटियारले काटिएका दागहरूसहित फेला परेका छन्। घटनाको प्रकृति हेर्दा क्रूर र पूर्वनियोजित आक्रमणको संकेत देखिएको उनीहरुको भनाई छ। घटना एकै दिन र एकै ठाउँ भएको अनुमान छ। शवहरू पोष्टमार्टमका लागि खिल्हरियातस्थित सिभिल अस्पतालमा राखिएको छ।

यता, जिल्ला प्रशासन कार्यालय, इलामले भने मेघालयमा मारिने नेपालीको घर ठेगाना पत्ता लगाउन नसकिएको जनाएको छ। मारिनेमध्ये एकजना रवि राईको घर इलाम भएको भनिए पनि अहिलेसम्म उनको घर ठेगाना पत्ता लगाउन नसकिएको इलामकी सीडीओ कल्पना श्रेष्ठले बताईन।